容易受傷的女人：周秀娜拍戲又整親　博到盡唔錫身

周秀娜拍戲成日整親，因為作為潮州女仔嘅佢，做嘢博到盡，一啲都唔錫身。娜姐目前喺泰國拍緊動作戲，佢喺IG Po咗幾張自己打到周身瘀嘅相，不過佢依然面帶笑容，似乎反而因為自己盡全力拍戲而受傷覺得滿足，仲話：「拍動作戲，瘀是常識吧！」

作為一個靚女，咁唔錫身，只為「一係唔做，要做就盡力做到最好」，呢句座右銘似乎成日都可以喺娜姐身上見到。從娜姐入行由𡃁模做起，當日大膽喺鬧市馬路除剩三點式泳衣令佢聲名大噪，後轉攻電影界，陸續得到一些外國電影節肯定，先後獲洛杉磯電影節及釜山亞洲新媒體電影節頒發「最佳女演員」，今年仲憑《29+1》入圍香港金像獎最佳女主角。娜姐入行十數年走來不易，只因佢面對每個挑戰都係盡力而為。