陳瀅轉會加盟邵氏　想做打女回饋觀眾支持：愈拍愈有熱情

作為一個鍾意睇靚女嘅人，相信冇咩消息開心過呢樣嘢，就係大家之後可以有更多機會喺睇到陳瀅（Jeannie）嘅演出。點解？就係陳瀅今日正式同邵氏兄弟簽約，成為佢哋旗下嘅藝人，等大家可以喺電視機、戲院銀幕以及網劇度欣賞佢個靚靚樣。

Jeannie接受《香港01》訪問時講解點解有呢個決定：「其實我入行就係做Model先嘅，但因為近呢幾年開始拍劇，就愈拍愈有熱情，想未來呢幾年都係Focus落做演員度，一路以嚟都收到好多人嘅鼓勵，台前幕後嘅、街外觀眾都有，所以都想回饋佢哋支持。」

其實香港大大小小電影公司都好多，TVB本身都係一個選擇，但點解最後落戶邵氏？Jeannie答道：「因為我除咗拍劇，都想試下其他方面嘅嘢，我嘅目標係做一個好演員，而唔係淨係一個Category嘅演員。（想拍咩類型嘅嘢？）最想做動作片，其實我係識打拳架！」

至於同舊公司Starzpeople係咪好嚟好去？Jeannie就咁答：「其實係好唔捨得，Starzpeople係我嚟香港嘅第一間公司，亦都係我第一份正職，喺度已經有八年時間，所以走嗰陣都有喊。老闆真係好錫我，知我香港冇人冇物，所以對我特別好，真係好似我香港嘅爸爸咁，當我有呢個諗法時，佢都好明白好支持我。（樂易玲話識你爸爸好耐你講緊呢個爸爸？）係呀，佢咁講我都嚇一嚇，哈哈！」