【飛虎之潛行極戰】陳偉霆拍無綫劇？ 樂易玲都想：佢啲劇係天價
《飛虎之潛行極戰》作為一部TVB跟內地的合拍劇，當然會在大陸優先播，在昨天的宣傳活動上，大會指出4月6日在優酷平台播，而mytvsuper則是同步播。不過TVB幾時播呢？樂易玲樂小姐在接受《香港01》訪問時話：「佢哋安排咗5月份播，不過係幾時呢，就等公佈喇，我哋已經知道㗎喇。」
今次用了過億的製作成本，邵氏今次落足心機希望打靚網劇招牌，樂小姐好有信心，她認為開一部戲連自己都覺得會失利就不應該開，她說：「開嘅時候應該就要有信心，之後就係睇你成功多定成功小，同埋睇你將成功定係邊個位。我而家已經覺得係成功，我哋全部最好嘅朋友同演員，都返嚟做好呢件好開心嘅事，即使拍攝過程辛苦，但拍完大家都覺得成功。如果一部戲可以好好咁拍完，咁多人幫手，我已經覺得係成功嘅一部份，如果所有嘢都係講錢同票房，呢個係後話喇。」的確今次真是陣容鼎盛，主演已經有苗僑偉、黃宗澤、吳卓羲、張兆輝、王敏奕、王敏德、黃智雯、吳岱融及陳凱琳，真是粒粒皆星。
今次是黃宗澤和吳卓羲離開TVB後再度合作，再次請返他們兩個，人工要跟足他們在內地的價錢，一定貴好多。不過樂小姐有另一種看法，她說：「佢哋今日同往日喺TVB嘅知名度，喺電影圈嘅份量都唔同咗，當然我哋係應該俾返合理嘅價錢喇。但係我覺得錢都請唔到佢返嚟，係好開心嘅一件事，頭先都有人話要留期返嚟拍，我覺得最困難係諗一個劇本，大家嘅戲份同份量都係咁多，呢個係最難度，我唔想厚此薄彼。」樂小姐看著他們入行，看著他們成長繼而成名，亦很自豪他們會回來拍劇。
【飛虎之潛行極戰】吳卓羲收友情價接拍：片酬係抵畀，我係抵用嘅
跟大陸做合拍，電影的做法很多時會請一位大陸的明星，以便打開在大陸的市場。現今大陸一線紅星，又是香港人，一定要數到陳偉霆，未知樂小姐會否找他合作呢？她說：「第一要睇演員時間喇，第二要睇戲種，其實陳偉霆同我哋都同熟，仲有李治廷喇。我哋開多啲劇喇，多啲製作，都想搵佢哋合作，你知佢哋真係好忙。佢啲戲佢啲劇係天價，同埋佢嘅收視喺內地都好好收視，佢又係香港演員，真係好值得為佢驕傲。」