說好的未放低林峯5年情呢？　吳千語同日睇周杰倫演唱會勁興奮

昨日林峯出席「第14屆香港影視娛樂博覽」時，終於開口承認分手，之前有媒體偷拍到林峯帶埋父母拖住個女仔出現在海洋公園，網民就起底搵出原來個女仔叫張馨月，係大陸內衣模特兒，係親戚特登介紹畀林峯做相睇對象，見埋家長睇嚟林峯都好事近。但另一邊廂，前女友吳千語就似乎未放得低咁，喺Facebook度寫：「五年間全心全意投入的感情，要完全放下實在不容易，大家請給我空間適應，未來我會勇敢面對。」但乜唔係之前被人踢爆吳千語因為搭上咗富豪，林峯先忍痛分手咩？

但呢頭吳千語講到自己好傷心，未放低呢段5年嘅感情，轉個頭佢就去咗睇周杰倫演唱會，唔知係夾定，定真係咁啱得咁橋，喺點唱環節被周董揀中咗同佢合唱，吳千語就揀咗唱《彩虹》，唱到：「妳說依賴是我們的阻礙／就算放開／但能不能別沒收我的愛／當作我最後才明白」，雖然戴住頂Cap帽頭耷耷咁，但唱到笑笑口，似乎心情未有影響，不過歌喉就有待改進。