【可怒也】任家萱燒傷疤痕被偷圖賣廣告　Selina怒罵：很可惡！

今時今日人人手機不離身，只要有短短幾分鐘空檔都要上網碌一碌。資訊當中夾雜唔少廣告，有明星代言當然比較吸晴，作為消費者感覺上都比較有信心，但實際上佢地係咪真係有接呢個代言呢？SHE成員Selina任家萱呢日喺網上貼圖，原來有奸商將佢燒傷疤痕當成去疤膏廣告，怒罵：「很可惡！」

7年前Selina於內地拍攝劇集時意外被燒傷，全身達54%面積被嚴重灼傷，經過多年治療後活動能力上大致康復，但身體無可避免留下燒傷疤痕。復工以來Selina不時為公益活動出一份力，亦大方展示燒傷疤痕，接受自己嘅不完美。一向溫婉嘅Selina呢日怒氣沖沖上載兩張相，原來有廣告相盜用佢嘅生活照，將手上食物改成商品訛稱佢有份代言。

Selina留言話：「網路世界很遼闊，卻也很可怕！喔！不！是很可惡！老娘手上明明拿着銅鑼燒，你們也可以合成『祛疤膏』！連粉專的貼文也可以盜用！？這麼會P圖為什麼不用在正途？太多人都來訊問我真假！我實在太害怕你們上當了！我只好在這邊公布：疤痕從沒消失，你們看到的美麗照片，都是我用真心笑容，以及大量修圖軟體完成的！」最尾仲加上Hashtag「有疤不可怕，無良才可怕！」網友紛紛留言支持，仲話會幫忙檢舉，唔好令無知嘅人再受騙。