【任噏亂評】Facebook同《流行經典》都係老嘢先睇　你同意嗎？

今時今日，相信大家都好少會睇電視，大台劇集一套比一套膠，唔少人都轉戰中、日、韓，唔係講緊食放題啊，係講緊改煲韓劇、大陸劇，咩《那年花開》、《三生三世》，相信大家冇睇過套劇，都有聽過個名。唯獨星期六日有個節目，令到一班平時唔睇大台嘅人，都願意係電視前面放低一個鐘，就係《流行經典50年》，呢個節目真係救咗唔少星期六日嘅收視，所以個節目就翻煲再翻煲，無限loop……

起初個節目本身就叫《流行經典50強》，請一班有翻咁上下經驗嘅前輩級歌手上台唱幾嘴，好似張帝、潘美辰、葉振棠、李龍基等等，一班唔講你會以為佢係唱粵曲嘅歌手一齊唱吓K，睇個卡士，觀眾Target應該係一班老友記。

誰知道個節目越玩越潮，嘉賓一個比一個後生，就連Joey都上去唱Medley賣回憶，側田、小肥、Shine，陳曉東都上埋去唱《劃火柴》，Facebook個個人爭住Share話「係回憶啊」，咁你就老喇。老係因為除咗你同班老友記一齊睇電視之外，仲因為依家邊有人玩Facebook，冇睇過條短片咩？街訪一班中、小學生，佢哋話：「Facebook係老嘢先用！」即係你啊！

新一代係用Instagram唔會上Facebook，相信你連Snapchat都未聽過啦；當大家仲笑緊「而我不知道陳偉霆是誰」嘅的士陳嘅時候，00後追星追緊TFBOYS、胡一天、迪麗熱巴、趙麗穎；星期六仲追緊《流行經典50年》嘅同時，人哋係上優酷追《熱血街舞團》睇陳偉霆同鹿晗Battle跳舞，節目入面仲有個勁紅嘅星叫王嘉爾Jackson，係人氣韓團GOT7成員之一，咩話GOT7？係咪粗口嚟？幫大家打打底，雖然王嘉爾Jackson係韓星，但其實佢係香港人嚟，依家喺大陸紅到核爆，係咪好混亂？仲荒謬嘅都仲有，依家喺大陸16億人口入面，「陳偉霆」呢個名係仲紅過我哋上神檯嘅「陳奕迅」，安已不。