張繼聰謝安琪做新潮父母　同大囝睇YouTube學整「鬼口水」

張繼聰與謝安琪10歲大仔張瞻近來就開戶成為Instagram用家一份子，父母均是娛樂圈紅人，果然有星級效應。短短1個月，就已經吸引1萬3千多人追蹤。不過，原來張繼聰都係考慮咗一排先同意兒子開設IG戶口。「我同太太當初都諗咗好耐。不過社交媒體，其實係佢哋呢一代好主要嘅文化。不過我同太太諗過，唔可以因為我哋嘅職業問題而扼殺咗佢嘅童年，更唔可能唔帶佢出街。之後傾完偈之後就同意咗佢開IG。」

張繼聰表示，當初未為兒子開設IG，其實是因為想保護他。「以前都試過幫佢開社交媒體，只不過冇咁高調。後來有人知道咗之後，就有一啲好攻擊性留言，咁其實對佢好唔公平。」

講到Instagram，張繼聰更表示自己與大兒子的興趣習慣有點脫節。「平時我個仔俾我睇嘅YouTube片，當然佢哋睇就會覺得好有趣，我哋睇就會覺得都係年青呃like嘅片。我哋都會同佢分析邊啲好邊啲唔好，過程入面我都發現自己老咗。（邊個你認得？）Logan Paul囉，打機片又有。整slime又有少女，原來宜家最興係自製『鬼口水』。我老婆同個仔都有玩，咪自己去買材料返嚟研究點樣整。」

聽落張繼聰同謝安琪兩夫婦都好開明，關於張繼聰教育兒子的方針，他説：「我盡量會當佢係好普通嘅小朋友。一個小朋友應該要有嘅成長環境同權利，我就盡量俾佢。冇理由個個同學都有IG就係得佢冇。當然有人是我𥄫到有啲資訊唔係咁好，我都會同佢講。」