【三個女人一個因】合作9年　潘嘉德激讚黃智雯：冇令我失望過

潘嘉德（德哥）在電視業界已經享負盛名，其監製的電視劇一直深受觀眾喜愛，當中以《刑事偵緝檔案》、《鑑證實錄》、《衝上雲霄》、《女人唔易做》、《On Call 36小時》尤其知名，甚至最近推出的《三個女人一個因》亦廣受好評。不過德哥表示，在完成手頭上工作之後，就會離開工作約43年的TVB。潘嘉德（德哥）接受《香港01》訪問時說：「我其實好長情，離開TVB工作其實只係另外一個階段。我唔會退休㗎。」

屈指一算，工作43個年頭，原來德哥與黃智雯大大小小已經合作了9部劇集。《三個女人一個因》中黃智雯演技更是一致好評，連德哥都大讚「滿意」。問到德哥為何鍾情於用黃智雯於監製的劇集時，他説：「佢參選香港小姐嘅時候我冇乜留意佢。但係訓練班畢業之後佢做司儀，我覺得呢個女仔有啲似顧老闆（顧紀均），我覺得佢嘅可塑性好高。」

德哥：「黃智雯拍嘅頭2套劇我都唔係好留意。到我要拍《搜下留情》，要搵一個演員做『鵪鶉妹』襯羅仲謙，咁我就諗起佢。casting咗之後，我就發覺佢領悟力同模仿力好強。到《巴不得媽媽》，佢就做一個唔戴眼鏡嘅『近視妹』。編審就攞咗一套以前瑪麗蓮夢露嘅黑白電影俾佢睇，佢就做得好好。所以自此之後，我哋就一路合作落去。」他們合作了9部劇集，問到德哥對黃智雯的評語。監製潘嘉德（德哥）說：「聽話勤力肯博，唔會『吖吱吖咗』。（好唔好戲？）我就滿意嘅，冇令我失望。」