同容祖兒分手 ？ 劉浩龍首回應避談：佢好就自然我好

最近有傳相愛五年的樂壇天后容祖兒（Joey）與男友劉浩龍（師兄）已經分手，而分訊傳出後雙方都透過公司表示不回應私人事，到日前Joey在活動中更指自己與師兄現時關係是「冇嘢好形容」，令外界對他們的感情狀況繼續估估下。今日，師兄便為自己有份演出的ViuTV新劇《VR驅魔人》記者會站台，亦接受傳媒訪問回應種種傳聞。

提到有人認為師兄是借分手傳聞去宣傳下月演唱會，師兄就指各人都可以有自己睇法，而他的確較早時間是好落力做宣傳：「但唔需要用呢個方法，用呢啲方法亦都唔會成功。」至於怎樣形容現時Joey的關係，師兄則謂：「我哋大家都好支持大家，佢好就自然我好。」未有正面回答是否已經分手。

然後話題好快便轉到去即將舉行的個唱，師兄指自己從一月尾開始操弗自己：「目標係減三十磅，依家減咗廿四磅，教練就話可以以三十幾磅做目標，其實心情唔算幾好，因為我好鍾意食嘢，瞓覺都諗起啲食物。」又笑指自己操肌非為剝衫，亦不考慮著See-through戰衣上台。