【向西聞記】睇完張繼聰做賤男 想追劇要等到5月

張繼聰去年被大台封殺，但幸好網劇《向西聞記》令佢得以「重生」，沒有大台的掣肘，張繼聰於劇中爆粗又爆金句，一開場已經話「喺香港最搵錢嘅工就係呃x人！再高一個level係呃x人錢，又唔犯法。」流俐之外仲字字鏗鏘，之後的借位扮口交、開多個假ig戶口自問自答呃like的場面，貼地之餘亦做到笑位。《畜牲傳心師》呢個單元，其實取材自去年有動物傳心師被踢爆呃神騙鬼的技倆。「動物傳心師有無專業守則，唔可以同客人上床？當然無啦，我又唔係呃佢同我性交轉運。」張繼聰於劇中有唔少類似的金句，網民都話正。而明日（15日)上架的下集，張繼聰已發展到馬場界，到底為咗賺錢可以去到幾盡？《畜牲傳心師》每集半小時，首集已經有胡杏兒、杜小喬、陳意嵐、王宗堯等人，加上張繼聰勁生鬼的演繹同讀白，絕對有追看性。

《向西聞記》故事改編自網絡作家、向西村上春樹的冊同名短篇小說，劇集分成13個單元。頭炮《畜牲傳心師》由張繼聰擔正，劇中他誤打誤撞成為動物傳心師，呃錢又呃女，重遇胡杏兒飾演的中學同學後，借為狗仔傳心為名約對方出街，結果車門一開，一條非常香豔的女性內褲出現於眼前，名副其實偷食唔抹咀。

《畜牲傳心師》之後，《骨與慾》、《獨男愛的機會》、《食女性地嘉亨灣》、《港男港女》、《因為寂寞所以健身》、甚至係唔少網民都好期待的《碌架床》等單元將會陸續上架，但據知，以上單元最快要5月先有得睇，如果以網劇來說，雖然各各單元不會有關連，但都大大影響了追看性。而HMVOD的另一自家製劇集《性敢中環》，由黃真真監製，何佩瑜、鄭欣宜、連詩雅演出，故事以中環做背景，全劇10集，預計今年第三季有得睇。