傳《美女廚房》翻拍救收視　當年節目一線花旦齊集卡士大

當本身用嚟攝期嘅處境劇《開心速遞》收視都可以贏到黃金時段嘅劇集，就知大台開始衰落，但可惜大陸人仔相當誘人，個個北上搵銀，喺蜀中無大將嘅情況之下，大台開始技窮，將僅餘嘅皇牌藝人同節目翻炒，好似Do姐同農夫呢個組合老是常出現，而《流行經典50年》Loop到連容祖兒都上埋去當經典唱medley，之後連JW、坤哥、糖妹都可以上節目，《流行經典》已經唔再經典喇。

星期六日收視插水，有傳大台打算翻兜9年前嘅皇牌節目《美女廚房》，當年集集都好有號召力叫咗好多女星上嚟煮嘢食，上至大台所有一星花旦，好似郭羨妮、廖碧兒、胡杏兒、楊怡、蘇玉華、蔡少芬，下至一班𡃁模賈曉晨、周秀娜等等，真係集集睇星都夠撐起個節目，所以當時收視真係驚為天人。聽聞節目將個改名出街，而監製都由錢國偉改做「錢國偉徒弟」陳旭亮，大家就拭目以待啦。

講起《美女廚房》，唔止係收視巴閉，就連節目內容都相當大膽踩界，夠膽搵楊千嬅上節目，同做主持嘅舊愛鄭中基同檯，個畫面尷尬到不得了。又敢叫埋Stephy同小方同框，隔壁做兄弟嘅梁漢文同鄭中基因為Stephy係阿嫂，未食都要畀滿分佢，真係往事只能回味。仲有好多經典畫面，好似阿佘當年長髮Look真係超Gfable，估唔到佢唔單止做戲叻，煮餸都好犀利；仲有9年前阿G.E.M仲未開始入魔著皮褲，18歲清純樣真係不得了，即刻想一次過睇返之前嘅《美女廚房》回味一下。