【翻生武林】張漢斌演死囚臭足4個鐘：含住嚿暖三文魚先難頂

《喜劇之王》入面的尹天仇，就算被火燒都不敢停低繼續演出，星爺演活一個專業演員的態度，想不到TVB亦有一位，就係上星期《翻生武林》第五集，劇中飾演被死囚的張漢斌，雖然該場戲只得短短25秒，但佢完全將一名死囚行刑前受盡的屈辱，演得淋漓盡致，一開始先被雞蛋掟頭，之後菜心、蕃茄、豆腐全部落佢身上，更要生食一嚿肉哽死，畫面相當迫真，直達電影級數，我哋睇得過癮，但張漢斌原來演呢場戲相當辛苦。仲攪到成身惡臭。

【心理追兇】綠葉王唔hea做依然有火　張漢斌：喺TVB冇火捱唔到!

有網友看完都cap下畫面，大讚張漢斌專業，不過他就好謙表示盡演員責任：「嗰日幾熱架，拍咗4個鐘左右，雞蛋掟埋嚟初時係無嘢，但過咗陣有就啲臭味，其實最難定係豆腐，因為都擺咗大半日，都好酸醙下，其實明嘅，大家都唔想，拍下等下係咁㗎啦；呢場咁短嘅戲，拍咗兩日㗎，因為第一次拍，導演想我被嚿肉掟入喉嚨哽死，我就俾舊三文魚掟落口十幾次，但監製返公司睇帶，覺得哽死嚿肉太細，唔夠說服力，所以要補拍，就變咗而家出街版本，我攞嚿肉食哽死。」真係好專業。

不過網友不禁要問明朝為何出現厚切三文魚腩，唔通係鄭和下西洋帶返嚟，大家唔好鬧無綫事事旦旦，原來有苦衷，張漢斌：「劇本寫係生豬肉，但導演就改咗係魚生，唔係真係擺唔到落口，不過就算魚生都食唔到，因為都擺咗半日，啲魚生都暖哂，擺落口6，7次，最後都吞唔到.....因為真係感覺好奇怪，不過拍戲係咁架啦，相信每一個演員都會咁做，出嚟效果好咪得囉，我完咗即刻去一廠更衣室沖涼。」呢啲咪專業囉。