【港女講感情】容祖兒劉浩龍5年戀情告急？　男人最忌冇上進心

成日都話要男女平等，真係有可能咩？

容祖兒自從同劉浩龍拍拖之後，大家一直都唔睇好佢哋呢段感情，一個係樂壇天后，英皇一姐，一個就撈極都撈唔起，最紅嘅一單新聞就係劉浩龍食飯嫌對面整車工人隻手污糟，「污糟手論」被人講足佢一個星期，應該算係佢嘅事業顛峰。因為佢哋兩個人喺事業之間嘅懸殊關係，自不然大家都default劉浩龍係食軟飯，雖然就冇證據顯示，但只要劉浩龍揸Benz食好西，大家都會覺得係Joey畀錢。

【港女講感情】阿嬌鍾欣潼認愛賴弘國　有錢有樣邊使人「埋單」？

【港女講感情】姊妹淘易惹猜忌　英皇「龍虎豹」走過16年最難得

一個被人話包養小白臉，一個話食拖鞋飯，面對住輿論壓力，Joey同劉浩龍都行到5年，都令唔少人大跌眼鏡。但現實中邊有咁多童話，女尊男卑注定冇好結果，有傳媒爆料「龍兒戀」終於玩完，而經理人Mani就封口唔回應話：「私人事不作回應。」唔覆咪即係默認？聽落就真係好似散咗，但咪住先，劉浩龍4月27喺麥花臣開演唱會，上網Check吓，嚴重滯銷，580蚊貴飛輕鬆禁到40張冇難度，今次話分手會唔會係宣傳咋？

不過其實喺娛樂圈女尊男卑呢條路真係好難行，好似之前Do姐同呂方，又或者蔡依琳同錦榮，女人喺一段關係做主導，通常都唔會有好收場，就算係當年世紀雙J戀，周董都可以話夠晒料同蔡依琳同Level，都唔算話係女尊男卑，但就係因為蔡依琳太霸道鍾意話事，雙J最終都係唔可以開花結果。

娛樂圈中其實有唔少情侶都係女方比較能幹，搞到男方就活喺「軟飯」陰影之下，不過都有唔少成功反Cup例子，所以唔好畀大家睇死自己，都係港女最鍾意講嗰句，睇吓你有冇上進心嘅啫。好似張繼聰咁，嗰陣同謝安琪結婚之後人人都謝繼聰謝太咁叫佢，但佢就冇被網民打沉，默默咁苦耕，佢冇揀job二線三線位都照接，仲要比其他人勤力，上位做一線小生拍台慶劇，用自己實力證明自己係唔需要靠老婆，仲夠養阿Kay等佢可以唔出嚟做嘢同埋一對囝囡，真係非常勵志！唔志佢，仲有蔡少芬老公張晉，楊怡同羅仲謙咁，羅仲謙前排做訪問其中一句說話講做嘢再辛苦，有時候打電話畀老婆佢同我講佢睇緊電視，頓時覺得辛苦可以換嚟老婆幸福生活係值得。

好簡單，其實再叻再能幹嘅女人都係想被男人照顧，而張繼聰同羅仲謙都仲膊頭去揹起頭家，再望返劉浩龍，加油啦你真係，天后都係女人，畀啲安全感佢。