40吋爆肌照睇到網民「流晒口水」　羅仲謙得天獨厚：我食乜都得

羅仲謙近年主攻中國內地市場，除了新年檔期有份上映的《西遊記．女兒國》之外，更有電視上播映的劇集《無間道》。羅仲謙接受《香港01》訪問時表示，稍後5月中左右到內地參與一部古裝電影的拍攝工作。不過近日最令網民關注的，莫過於是羅仲謙於Instagram上張貼的一張做gym相。驟眼睇胸肌真係起碼有成40吋，真係睇到班粉絲個個熱血沸騰，問到羅仲謙操肌成績時，佢就話：「秘密。」

今日（3月11日）羅仲謙出席慈善活動，接受《香港01》訪問時就講到自己每日都會堅持做gym。「盡量每一日一次，但係嗰一個鐘頭要好專心，連電話都要鎖落locker。（做gym係主要練乜？）每一日都唔同，會操大腿肌肉、膊頭、背脊，胸部、二頭肌、三頭肌。多數都係呢6㨾，6樣循環咁做，一日一樣。」

羅仲謙也分享了其中練二頭肌的細節。「其實二頭肌好多時都會用到，但係二頭肌肌肉有分內同外，同埋夠唔夠長，所以變咗有人會練得唔夠立體。練嘅方法由低去到中間，定中間去到上面，或者坐喺度玩定趴喺度玩，效果都唔一樣。我通常都係用機械（負重）去訓練。我練手瓜通常都係練6-7組動作，每組動作大概係10-15下，1個鍾一個動作做3組左右。」

保持完美身形，好多時都需要飲食配合。有些需要急速練大隻的藝人可能需要日食卅隻雞蛋，又或者戒食澱粉質之類。羅仲謙自言自己就沒有這個規定，幾乎係「食乜都得」。羅仲謙説：「我冇刻意去戒食，不過主要就係肥嘅嘢唔食，但係我乜嘢都食。因為我自己體質係需要多啲蛋白，肌肉先會發達。我平時都會食好多飯或者粉麵。教練仲話我可以任食，因為消耗得多，如果唔係會進步太少。」

羅仲謙自言，健身需要掌握基本工，自己並没有刻意去「練大隻」。反而他追求的是身形健碩之餘又「firm」。「做gym如果急嘅話，未必係好事。其實我睇返我以前啲相，我覺得唔靚。我宜家跟咗個新教練可以幫我操到理想身形，大約半年時間。不過宜家仲未達到我理想中嘅身形，我諗仲要年半時間左右。」