Netflix《Verónica》玩西式碟仙　背後真人真事仲恐怖過電影

Netflix真係好多嘢睇，最近就有一套西班牙恐怖片《Verónica》新鮮上架，喺爛蕃茄上面仲拎到88%高分，為電影執導嘅更係拍過《80分鐘死亡直播》嘅Paco Plaza，似乎值得一睇。不過，睇之前見到套戲中文名譯做《靈蝕》時，就覺得成件事打咗折扣。

都要講一講套戲係個故事係點先，套戲就講述一個馬德里15歲少女叫Verónica，有一日就趁住日蝕同班朋友喺學校地下室搞降神會（類似中國嘅碟仙），打算招死咗一排嘅老竇個魂魄傾兩句，點知就中哂大伏惹咗邪靈返嚟。之後佢就經歷一連串嘅靈異事件，包括無啦啦個身多咗好多抓痕、幫細佬沖涼啲水無啦啦變得勁熱，同埋發夢見到鬼手。

學校個盲眼修女就話佢玩命，叫佢好好搵方法保護好佢細佬妹，之後佢就發現原來個降神會係要講拜拜先完到，所以佢就搵佢細佬妹（佢啲朋友睬佢都傻）再「開會」，只可惜隻邪靈Say No，仲用塊爛玻璃割佢頸。雖然Verónica一早報警，但到警察入屋時，佢哋只能眼白白睇住Verónica凌空尖叫，就算急急送院最後都宣告不治。

其實套戲真係同《80分鐘死亡直播》比爭少少，因為《80分鐘》係以紀錄片方式去拍攝，好容易令觀眾以第一身嘅角度陪住女主角感受到嗰份無助感。你問《Verónica》恐唔恐怖？不過不失嘅，雖然故事好簡單，但勝在特技、配樂同音效都做得好好。不過，就算套戲幾恐怖都好，都遠遠唔夠背後嘅故事恐怖，因為成套戲都係真人真事改篇。

同樣係1991年嘅馬德里，一個叫Estefania Gutierrez Lazaro嘅少女喺學校玩完通靈後，就連續幾個月都出現癲癇症症狀同睇到幻覺，仲話有好多黑影經常喺佢身邊周圍轉，最後佢喺醫院死咗。之後，Estefania嘅父母（真人真事裡面佢老竇冇死）就不時喺屋企見到啲異像，例如無啦啦有啲耳語聲出現、啲熄咗嘅電器無啦啦開著等。隔咗成年，佢父母終於頂唔住打電話報警，探長José Negri就以為佢哋間屋有人潛入，所以就帶咗成Team人到場。

好快佢父母就講咗個情況畀探長知，佢哋話屋企度門嗰日成日都係咁嘭埋，又話經常有個黑影穿過道門，之前個黑影仲企圖勒死瞓緊覺嘅Estefania媽媽。之後，一班警察就親眼目睹到呢啲怪事，不斷間屋聽到嘭嘭聲，其中有兩個探員就突然覺得好想嘔、頭暈同埋成身震哂，搞到即刻要離開大樓，仲因此而請咗兩個禮拜病假，而探長亦喺事件發生後申請調職。喺José Negri寫嘅調查報告裡面，佢就寫咗「無法解釋」嚟概括成件案件，而呢件事亦係西班牙首次有警員親身經歷兼紀錄在案嘅靈異事件。真係信不信由你呀！