【早霸王】家姐細妹電台罵戰 森美直播都叫唔停
每逢一到星期五這個日子，就知道係《早霸王》表白環節《你知道唔知道有人掛住你》的時候，今日個聽眾叫做「Amy」，但佢就唔係示愛，皆因佢已經係兩個囝囝嘅媽咪：「我打上嚟係想同我家姐say sorry，我移咗民架喇，依家返咗香港度假，喺紐西蘭返嚟嘅時候好忙，忙住同親戚朋友食飯，過我自己嘅生日，同我個仔生日，就忽略咗家姐，佢見我啲相入面冇佢，所以佢嬲咗我唔理我。」
【早霸王】女友嗌分手挽留失敗 森美一語中的： 要知自己錯咩！
森美聽完覺得冇約食飯啫，好少事，就猜測因為呢對姊妹係孖生：「你哋係咪孖生先，係先嚴重，同一日生日就冇一齊慶祝。」但原來唔係喎，Amy話佢成家有8兄弟姊妹，都顧唔掂咁多個：「其實多數都係我搵佢多，佢份人比較內歛，佢唔睬我，平時我哋都係WhatsApp多，咩都WhatsApp講晒，一陣都唔知講咩好。」兩姊妹邊會有隔夜仇，森美就安慰佢如果諗唔到講咩咪讀返WhatsApp嘅訊息出嚟囉。
今次就冇咩懸念，森美直接就打畀Amy家姐Alice睇吓發生咩事。
Amy本身都主動出撃問家姐嬲完未，做咩唔覆佢message，就算佢冇主動搵家姐，都提議家姐可以主動搵吓自己，但點知Alice一開口就聽得出佢好重怨氣：「我返工又忙，等你哋自己搭飛機返嚟啦，我地都唔得閒搭飛機去搵你，唔講嘢喇，廢事搞到大家唔開心。」Amy一聽完情緒好激動，已經聽到佢把聲係喊緊：「一年到兩年半先返嚟，我返嚟都係想見到大家開心，你咁樣我都唔開心，我真係一時疏忽，平時都係我搵你多，我唔知你咁在意，對唔住啊，你唔好嬲啦，我哋都冇夾到話唔搵你，真係咁啱咋。」
真係好似睇《溏心風暴》咁精彩，森美想插嘴都搵唔到位講嘢，家姐Alice都喊住回撃：「但我好多時都被家人忽略啦，我唔係隱形唔係透明架，我只係唔想帶畀屋企麻煩，但你地個個都當我隱形透明！」Amy都愈說愈激動：「我哋唔係當你隱形透明你明唔明，個個都忙架嘛，你都要體諒其他人。」女人嘅感情真係咁脆弱，你同我係屋企人，但點解你ig張屋企人相冇我份，簡直好似有條刺拮咗係心口，家姐唔理森美想插嘴繼續哭訴：「本身諗住等緊同你慶祝生日，點知原來你地之前已經慶祝晒，我完全唔喺入面，但你仲話多謝所有兄弟姊妹，你都冇問過我地去唔去！」
後尾森美真係頂唔順直接強行插入呢段女人之間嘅罵戰，問家姐接唔接受細妹嘅道歉，但似乎就冇咩作用，Alice唔收貨話唔係道唔道歉嘅問題，要啲時間下咗呢啖氣冷靜吓，Amy最後爆seed再挑起戰火問家姐：「你唔覺得你離開咗WhatsApp呢個群組好有問題咩？」背景聽到森美同小儀笑到出聲，只好強行中斷呢段女人之間嘅罵戰，今次仲突發搞到新聞報遲咗，所以話，女人發起火上嚟真係禁都禁唔住。