陸永老婆11月座駕被撞　 IG大罵肇事車主4個月未賠錢

陸永太太Reina上年11月發生交通意外，佢當時部車落地唔夠一個月，被另一部車撞到，座駕被刮花，Reina事後喺IG開PO，分享反呢件事，指當時肇事車主答應賠償，但要求Reina唔好返原廠整，Reina寫道：「落地唔夠一個月，停定讓人泊街S位都可以俾人hi花咗，點解會咁㗎？返原廠會唔會好過份？對方肯賠不過唔賠返原廠整，等我心情平復返先再考慮。」仲話已經去警署備咗案。好多朋友留言都話肇事者整花人哋架車，唔應該仲要求唔畀人返原廠整，大家仲話Reina易話為。

以為事件已經告一段落，事隔4個月，Reina喺Instagram開Po，大動肝火大罵當日嗰位車主仲未履行承諾賠錢，仲將同對方嘅對話Po上網，等大家評吓理，佢寫道：「#人善被人欺，早知返原廠整claim保險好過！唔通我未收你錢，我同ah Sir講你已經賠咗畀我咩？落口供就落口供囉，輸咗我咪畀堂費囉⋯⋯ 我有時間，我唔怕麻煩！痴ｘ線，毛(無)啦啦受你氣！#我好等2600開飯呀！」由於車主未賠錢，而該名車主又話簽唔到和解紙，所以Reina要去警署落口供，遲吓仲要上庭添。

從Reina同肇事者嘅對話睇嚟，一開始Reina已經好讓步，真係應對方要求無返原廠整，而該名車主就話：「希望你真係幫我報間最平。」仲話Reina係名人佢只係一般巿民，承諾會過返數畀Reina，希望大家就咁完咗件事。不過直到今日該名車主都仲未過數，期間仲諸多藉口。Reina老公陸永都有留言：「我叫你搵佢，你都話等過埋初十五先追，仁至義盡喇，唔駛勞氣。」睇嚟其實Reina其實已經畀晒機會對方，但對方卻一直拖字訣，其實拖咗咁耐Reina先嚟爆，都真係算係「仁至義盡」。