【周遊東京】凌晨到埗只能去築地？ 周奕瑋推介廿蚊休閒好去處
撰文：洪曉璇
出版：更新：
廉航當道下，好多人去旅行次數都以倍數上升，不過有利自然有弊，好似日本航線好多時都係凌晨抵埗，出到市區都仲係8、9點，想shopping又未開門，酒店又未有得check in，實在令人相當苦惱。節目《周遊東京》中周奕瑋喺新一集就介紹咗個好去處，廿幾蚊一個鐘就有得食有得抖，啱晒搭凌晨機玩到盡嘅各位﹗
航空公司個個月都有sale，幾百蚊飛日本的確好吸引，凌晨機往返係就係玩到最盡，不過酒店未有得check in，想搵個地方休息，錢湯築地以外仲有好多選擇。周奕瑋推介可先「入住」一些每小時計費嘅休息室，專門為東京轉車或凌晨機到埗旅行提供休憩空間，收費大約廿幾蚊港幣1小時，收費已包括行李寄存、自助任飲任食、漫畫任睇、沖涼，真係租儲物櫃放行李都唔止啦！
而呢啲休息室最正嘅係有美容家電及化妝品可以免費任用，去日本嘅女士九成都會大手買入化妝品，以及各式各樣美容小電器，唔識日文唔知有咩功用？喺呢度先行試用就啱晒啦，扮到靚一靚再去掃貨。而男士就可以沖涼後坐下按摩椅，瞓低補眠又或者睇漫畫，一定唔會悶親啦。
+4
北海道毛蟹、海鮮丼、海膽宴，都是吸引海鮮愛好者到日本嘅一大理由！Jarvis去到一間每日有大量日本人排隊嘅小店，一睇就知係地道又抵嘅餐廳啦！識途老馬入到餐廳最緊要識睇餐牌，好多時隱藏菜單都係無圖睇架。Jarvis就教大家妙用餐牌上嘅額外要求，「裏の名物」即係隱藏招牌菜、「具增し」即係加餸。
呢間餐廳加100円就加到餸仲可以任加，Jarvis面前呢碟有齊燒吞拿魚、火炙吞拿魚、牡丹蝦、八爪魚、蟹螫、三文魚子、帶子、吞拿魚蓉、中吞拿魚腩、油甘魚、三文魚、螺、雞蛋、小蝦、鯛魚15款即日最新鮮嘅魚生，加咗300円三份加餸，都不過係2090円，百五蚊港幣有找﹗真係好抵呀！