【忘形水】鄒凱光踩奧斯卡最佳電影唔好睇：點解唔係《鄧寇克》！
每逢到奧斯卡舉行的季節，總有一班專業影評人和「忽然影評人」在不同的渠道大放評論，大估特估各個獎項最後花落誰家。估中，就會話自己有先見之明；估錯，就當冇呢件事，哈哈兩聲笑完就算。雖然今屆頒獎典禮已經圓滿落幕，更由電影《忘形水》勁擸「最佳電影」和「最佳導演」等四個獎項成為大贏家，但事前不少人都比較睇好《廣告牌殺人事件》可奪得最終大獎，所以這個結果都令好多人的眼鏡玻璃碎片跌到一地都係。
好似曾經執導《12金鴨》和《金雞SSS》等加加埋埋有億萬票房的大導演鄒凱光（灘叔），便是其中一個「碎片供應商」。灘叔在頒獎典禮舉行前一日（星期日）便於自己主持的商台節目《無定向喪煲病狂》中，狠批《忘形水》不濟，更暗示電影不值提名。當節目拍檔阿檸（薛晉寧）話最後會是《忘形水》或《廣告牌殺人事件》其中一齣戲獲最佳電影時，灘叔即勁大反應，聲調拉高兩度問對方：「點解唔係《鄧寇克》？」他指自己非常明白《廣告牌》何以獲睇高一線，但完全唔明《忘》有何可觀之處：「真係唔好睇！」
他之後又喪踩《忘形水》片拍得不夠瀟灑、對比起其他入選電影完全「唔勁」，他不但指電影只是典型荷里活愛情悲劇戲碼，故事結構非常簡單，又稱打造的世界不及《Hellboy天魔特攻》，開場後拖了足足半個鐘先開始有女主角和與她墮入愛河的怪獸逃走情節，更勁彈女主角莎莉賀堅絲不夠索：「醜又醜唔哂，靚又靚唔埋，一開始冇耐就整場全裸浸浴畀佢，逼觀眾用情欲眼光睇呢套戲，驚你哋淨睇呢個女人同怪獸好悶，但係佢個身形又唔吸引，你可以冇身材得嚟又好吸引架嘛！」
至於阿檸亦同樣「眼光獨到」，他在節目中便指近十年的「最佳電影」和「最佳導演」都不是同一部戲，所以推斷《廣告牌》和《忘形水》會分別獲「最佳電影」和「最佳導演」，但最後偏偏由《忘形水》包攬這兩個獎項。看來香港導演和美國的品味真是有好太分別。