林欣彤推出新歌《忍》　大談戀愛經歷：每次際遇都好恐怖

林欣彤（Mag）去年簽約王祖藍公司旗下，令其事業得到重新出發，早前翻唱Dear Jane的《哪裡只得我共你》更獲得唔少網民讚賞點擊數爆燈，Mag食住個勢推出新歌《忍》，更找來大師級填詞人林夕操刀。昨晚到商台節目《聖艾粒忌廉夜校》宣傳新歌時，她就自爆曾經做過第三者，而當時更試過大膽致電正印叫對方搞清楚。

對方唔認有女友

節目一開始，林欣彤就以「戀愛大過天」形容自己，但她亦直言每次的際遇都好恐怖。「有次去唱K之後，返到屋企發現唔見咗條圍巾，與此同時收到個WhatsApp，內容大概係話佢係邊，然後就話執到我條圍巾。」Mag指A君只在K局上見過面，亦不解對方如何取得其手機號碼。「佢之後拎條圍巾去我屋企，仲要乾洗埋，我覺得唔好意思所以就請佢食飯。」

Mag見A君十分照顧家人，又同自己傾得埋，於是決定與對方發展感情。「有日陪佢睇車，在馬路上撞到一個共同（女性）朋友，我當時仲好開心咁同對方打招呼，之後收到該名女性朋友的WhatsApp，內容係同我傾訴愛情煩惱，但我發現佢嘅對象原來就係A君。」Mag即時向男友問罪，對方先是否認，其後才承認曾與該女性朋友拍拖，並提出過分手，唯對方一直拒絕。「佢係咁話個女仔纏住自己，又話佢好癲。」

三角關係好痛苦

對男友深信不疑的Mag更為此致電該女性朋友，叫對方搞清楚。「但我後來發現原來佢哋有一齊出街，而A君亦講咗好多大話，當時因為太鍾意呢個男仔，所以成日鬧交，真係好痛苦。」Mag指這段三角關係大概維持了兩三個月，最後因為太痛苦而決定退出。對於無辜成為第三者，Mag表示十分無耐，更指將來一定帶眼識人。
 

情路坎坷

林欣彤出道初期，曾與羅孝勇拍拖三年，唯分手後才承認該段戀情，之後Mag與初戀男友Ben愛火重燃，惜多次遭對方暴力對待，最終分手收場。2016年時，Mag曾被影到與補習天王David Chiu（趙永康）於街頭甜蜜親熱，而當時趙永康隨即被爆曾與前港姐張舒雅、歌手AGA拍拖之餘，亦追求過G.E.M。Mag事後接受電話訪問時，只肯透露A君是圈外人，但對該段感情就以「唔記得係幾耐之前發生」回應，看來趙永康的嫌疑也不少。