遊日港媽影人相批鬥唔讓座 周奕瑋：日本有肖像權唔可以亂影
撰文：張嘉敏
出版：更新：
在香港公共交通工具上的關愛座似乎已變成了批鬥座，因為坐唔坐同讓唔讓座的問題經常都會被放上網公審，而呢股風氣還吹襲到日本。近日有港人在日本旅行時因爲在列車上見有年輕人坐關愛座，卻未有讓座給年長的她，於是影了對方相兼放上facebook鬧爆，又指責那些年輕人在車廂中進食。結果引來網民熱烈的討論，不過網民都是批評這位出post者唔啱，話日本人唔鍾意讓座同被讓座，就算年紀大也不是「老馮」有得坐關愛座，又話其實當地的列車上是可以飲食的。
近日憑住無綫旅行節目《周遊東京》人氣急升的藝人周奕瑋 (Jarvis) 對日本文化相當熟悉，問到他日本人是否真的如網民所講唔鍾意讓座同被讓座，他說：「日本人都有唔同嘅性格，讓唔讓座同接唔接受人讓座都好睇個人，但係日本人普遍都唔鍾意畀麻煩人，唔想影響到人，覺得自己會失禮，咁當然唔係絕對嘅。同埋日本嘅優先座係唔可以用電話，就連隔離啲位置都唔可以用，因為手機嘅電波會干擾到高齡或殘疾人士配戴嘅心臟起搏器，坐優先座就可以避免，呢個先係當地優先座嘅作用。」
相關文章：
【周遊東京】神社參拜開運小知識 周奕瑋：御守有期限非keep一世
而當Jarvis看網上這個討論時，最在意反而是投訴人影了年輕人的相兼且放上網，他指出在日本絕不能擅自影人相。Jarvis說：「日本人個樣係有肖像權，我唔知網絡上嘅rules係點，但喺日本國內未經人同意係唔可以影人相，所以啲電視節目會幫人打格，一定要問准咗當事人先影得，如果無問過就係侵犯肖像權。我哋個節目入面每位出鏡嘅日本人都係問准過可以影先會影。雖然我唔知犯咗肖像權法有咩懲罰，但大家都會去遵守。」他又謂近年多了外地遊客遊日，很多地方都多了告示叫人唔好亂影相。