家燕姐紅遍亞洲是常識吧 越南歌手靠唱《皆大歡喜》爆紅
撰文：史順宜
出版：更新：
TVB古裝處境喜劇《皆大歡喜》，相信不少電視迷一定有睇過。而且與劇名同名的家燕姐名曲《皆大歡喜》更加係聽到前奏已經人人識唱，絕對係一首洗腦神曲。早前就有越南男歌手（Jun Phạm）出席當地選秀節目時，更加模仿家燕姐唱《皆大歡喜》，眼見他的戰衣及台上動作，真係有幾分家燕姐的影子，加上他唔鹹唔淡的廣東話，令整個表演喜感十足。唱到副歌「唏呀唏呀唏 唏呀唏呀唏」時，更全場大合唱，可見其實《皆大歡喜》在越南有不少人認識。
家燕姐接受《香港01》電話訪問時大讚Jun Phạm的演出：「呢個男歌手Jun Pham聽講佢喺當地都好有名氣。我好欣賞佢，睇得出佢真係好認真去學唱我首《皆大歡喜》，仲有廣東話發音一向都唔易學，但係佢都唱得唔錯。佢台上嘅動作同打扮都模仿得好似，件衫同我嗰件真係差唔多。我好開心有人扮我，見到啲觀眾都識唱一齊唱，証明首歌喺越南真係好流行。我聽到佢唱副歌都覺得好興奮。我希望可以同佢合唱《皆大歡喜》哈哈哈！」
家燕姐續說：「其實TVB有好多劇集都會喺越南播，而且都好受歡迎，所以劇集嘅主題曲都好受大家歡迎。」
+2