【SuperGirls】好姊妹為愛反目半年？　同出活動仍然「零交流」

俗語有話，多人就多是非。而女人又有得你叫，「女人心海底針」。所有睇落冇嘢，口講冇事嘅時候，往往就係最「驚濤駭浪」。早前香港女子組合SuperGirls就傳出因為兩位成員陳穎欣（Yanny）和李靜儀（Heidi），因爭男友而反目成仇，勢成水火。據傳事件就是因為Yanny成功撬走Heidi的有米男朋友陳考威（Gareth）而引發，故事的最後，Heidi更是敗走台灣拍戲逃離傷心地。故事發展真係十足十電視劇情節咁。

今日TVB節目《周遊東京》，TVB日本通周奕瑋就邀請了SuperGirls到記者會撐場。想當然，大家就會想起傳不和的Yanny和Heidi。雖然事件已經過了大半年，但是出席記者會活動時，亦正如大家所料，2位無論鏡頭前後又或者坐埋一齊食飯的時候，都依然「零交流」。排排企影相，又或是傳媒訪問的時候，全程都有人隔住。所以話，呢個不和傳言真係好難解釋，好難令人相信佢哋真係冇芥蒂。