李佳芯代言支付寶過關　黃心穎高鐵賣廣告出事　網民雙重標準？

某部分香港人對於「Made in China」相當敏感，凡是來自中國的都覺得會爆炸，反正就是不愛國貨。所以每逄有藝人北上拍劇做節目，都會受到猛烈攻擊，好像之前有陳偉霆、陳小春、李克勤等等，而最令大家印象深刻的肯定是宇宙歌手G.E.M.（鄧紫棋），她在香港出道，之後因歌唱比賽節目《我是歌手》在大陸爆紅，就直接轉Location主力在大陸搵人仔，儘管唱功不俗，但還是被香港網民嫌棄。

時至今日，搵人仔是大趨勢，但同人不同命，Ali（李佳芯）前幾天代言大陸「支付寶」拍廣告，網民少有地不反感，還大讚廣告商食字，「Ali代言Ali Pay」，又為她辯解Ali雖然賺大陸人錢，但還是心繫香港。Ali自己沒開聲解黎，粉絲們已經衝出來擋駕說廣告是大台幫她接的，她自己沒有選擇權，真係人紅做乜都啱。

但其實早在幾個月前，同為大台的黃心穎同樣是接了「中地兩檢」含有大陸成份的廣告，但就被全港市民圍剿，大鬧她是「賣港賊」，明明同為大台藝人，待遇差天共地，網友頻頻搬龍門，又似乎唔太公平喎！