【港女講感情】梁嘉琪被金志堅「綠帽」　千祈唔好信賤男會改過　

今日終於放完連假要返工，真係唔係幾慣要返工，個個都「初四咁嘅樣」，不過原來有嘢比返工更Sad。是非精梁嘉琪喺Facebook宣佈同商台男友金志堅分手，平時見佢係節目度鬼殺咁嘈，但今次同男友分手就好平靜，冇約埋記者朋友一齊喊苦喊忽，原因佢就表示話唔打算講，都係通普遍分手理由一樣，「兩人之間的問題早已存在」，情侶個個都係咁，因相識而一齊，因了解而分開，好似容祖兒嗰歌咁「大個女縱使失戀工作至上才爭氣」，梁嘉琪希望都係focus返喺工作上，希望大家畀啲空間佢。

【港女講感情】情人節係場攻防戰　袁詠儀收老公粉絲送花最有Face

【港女講感情】平安谷女人嫁邊個冇得揀　現代就有男朋友都難結婚

本身兩個人唔夾分手就好小事，但就有雜誌爆料話佢男友係偷食，仲食仲唔止，係食返前女友，前女友都未算盡，仲要搞大咗前女友個肚，真係好難計呢位金生犯咗幾大罪。前女友本身就係所有女仔嘅禁忌，佢仲要有聯絡，其實淨係呢條罪已經可以即飛，仲要大埋肚，真係唔使諗，即刻delete同unfollow啦！唔少網民都安慰梁嘉琪，大讚佢做得好，話如果唔係結咗婚先發現老公係賤男，到時真係後悔莫及。

的確，一次不忠百次不容，偷食絕對係死罪，零容忍！千祈唔好一時心軟就原諒，偷食一次被你捉到就話啫，咁見唔到嘅都唔知發生過幾多次啦，就算賤男肯改過，以後你都會心有戚戚然，成日形住佢一唔喺視線範圍內就肯定會做衰嘢。對感情唔忠誠，就好似白紙唔小心染污咗一個黑點咁，會喺你心中劃下一道裂痕，無論做咩都冇辦法可以再修補，話知你發毒誓會死全家。既然有人狠心去傷害呢段關係，就冇謂再FF佢會改過，分手要狠，You deserve better！