【狗年】陸詩韻戚黛黛愛狗如命　訓練方法不一致成家人磨心

狗係人類最忠心嘅朋友，來到狗年一班可愛嘅汪汪仲帶挈主人們多咗唔少工作機會添﹗陸詩韻（Sharon）以及戚黛黛不約而同，帶埋愛犬接受奇妙娛樂新聞主播嚴崇天訪問。Sharon曾經透露第一隻狗狗是初戀男友送，呢日帶出嚟嘅貴婦狗Kina相當聽話，但原來同時都係Sharon同陸媽媽成日嗌交嘅導火線之一。

作為一名狗主，陸詩韻（Sharon）自認都幾嚴厲，佢笑言：「我惡死架，有時一大聲講野，Kina(貴婦狗)就即刻坐定定，１０分鐘都唔敢郁！」愛犬Kina現年８歲，因為工作關係大部份時間Kina都由陸媽媽照顧，呢個時候Sharon忍唔住呻說：「我地兩母女成日嗌交都係因為隻狗！」原來陸老太對Kina過分潺愛，Sharon稱：「邊有人追住隻狗要佢食野架？！我就唔會咁教狗，擺低野食，一段時間內唔食就拎走，唔可以又追又玩咁氹佢食野囉！」

至於戚黛黛就養咗隻西施狗叫妹妹，戚家上下視如寶貝寵愛有加，同時因為過度潺愛，以致妹妹行為不失控制。黛黛苦惱地求救：「其實佢識聽晒所有指令，但就係唔肯做囉，要睇心情！」見到佢咁苦惱，主持嚴崇天安排佢帶妹妹接受狗狗行為改善課程。導師指「妹妹」平時「要乜有乜」，已習慣「不勞而獲」，提議黛黛改以新奇食物重新吸引「妹妹」注意並改善其服從性。黛黛笑道：「妹妹真係老闆，因為佢每日都有得揀。今日食完A餐，聽日就要改食B餐，好食好住！」