麥玲玲年年初三都開工唔驚赤口 見人嘈會勸交：唔好嘈喇家嫂

今日係農曆新年大年初三，中國傳統又稱「赤狗日」即是赤口，相傳易起口舌之爭，所以呢日不宜拜年。不少人都會避免於初三去拜年，而改去拜神祈福，至於麥玲玲師傅就同以往一樣，為沙田馬場的農曆新年賽馬日擔任開運嘉賓，在工作中度過。問到玲玲姐有否試過在年初三拜年時同人有拗撬，她說：「咁又無喎，我初三通常要開工，唔會去拜年，做嘢又無特別話會同人嗌交，嚟馬場都係想大家開開心心。」

玲玲姐勸大家無論是否初三赤口，農曆新年這些節日就唔好同人嗌交啦，她說：「忍一忍啦，要一團和氣吖嘛，過年呢啲喜慶日子唔好咁暴躁，正所謂相嗌唔好口，忍咗去算喇。」問到她有無試過見到親戚朋友拜年時嗌交，她說：「細個時都有見過㗎，見過啲親威同啲工人姐姐鬧交，唔滿意啲工人姐姐嘅表現，鬧佢哋，同佢哋開年。」如果玲玲姐現在遇到呢類情況，都會嘗試勸交話：「唔好嘈交喇，家嫂。」