鄭裕玲幫劉嘉玲翻三十年冤案　拖埋周海媚落水：佢先係遲嗰個

鄭裕玲（Do姐）邀請咗劉嘉玲上電台節目，兩位阿姐好耐無見，喺節目上大爆當年情，Do姐大嘉玲8年，亦比佢早8年入行，嘉玲話初入行時，Do姐已經係阿姐級：「Do姐係前輩嚟，佢一入化妝間啲化妝師就叫我哋起身，讓位俾Do姐坐。」Do姐聞言大笑話唔知有啲咁嘅事，仲話自己不知幾和藹可親，不過嘉玲就話：「你嗰時真係好惡㗎。」

講講吓佢哋就講返起坊間流傳咗好耐有關佢哋兩個不和嘅傳聞：「有件事真係要澄清吓，記得嗰陣拍緊《流氓大亨》，有日有人遲大到，咁我見人遲到會好忟，我就問嘉玲係咪佢遲到，但遲到嗰個唔係佢，傳傳吓就變咗我鬧佢遲到，直至早幾年《康熙來了》仲問緊嘉玲呢件事，但遲到嗰個唔係嘉玲。」《流氓大亨》於1986年首播，咁呢單32年嘅冤案，究竟邊個先係遲到嘅主角呢？

雖然事隔咁多年，但嘉玲就記得當時邊個遲到：「遲到嗰個係周海媚，佢遲咗兩個鐘，你當時就行埋去問佢：『點解你要遲到，我依家去飲茶，你慢慢化妝先。』」Do姐就話自己一啲印象都無，同埋可能Do姐依家睇嘢好淡，呢件事又過咗咁耐，佢打圓場笑住話：「都唔知係咪你（劉嘉玲）記錯，無啦啦拖埋周海媚落水。」