【平安谷】沈卓盈其實識演戲 演北杏被殉葬：我自己都好享受
仲有2天就大結局的TVB劇集《平安谷之詭谷傳說》，由蘇玉華帶頭的「抗暴聯盟」，除了有龔嘉欣及譚凱琪之外，其中一位飾演「北杏」人稱沈大師嘅沈卓盈(Jess)。雖然劇中她的表現未算太過突出，但至少今次劇集都算令人眼前一亮，起碼看得出她有用心演好這個角色。沈卓盈接受《香港01》時就話無論係被老公虐打戲還是被殉葬，「拍呢幾場其實我自己都好享受，因為全程投入被人欺負同傷心，我覺得好正，搞到我自己係被虐狂咁！」
相關文章：
【平安谷】變黑兼硬食饅頭 樂瞳好抑鬱：我嘅人生會唔會就咁完？
Jess指現實生活中自己同北杏嘅性格，簡直係兩個人，「因為北杏比較細膽，怕事啲，講嘢細細聲，完全同我本身性格完全唔同，因為我係講嘢好直同爽快嘅人。」她指每次拍攝前都時刻提醒自己，要tune返好把聲。今次《平安谷之詭谷傳說》成績咁好，Jess都話好開心，「劇本真係寫得好好，可以表露出當時封建社會中女人嘅無奈同認命嘅命運，所以每一part自己都好用心去演繹。」另外，Jess亦透露男友都十分識做，每晚都坐定定睇劇集，仲叫家人同身邊好友捧場，「佢見到我係套戲入面俾人打都戥我可憐，所以食飯嗰陣都叫我要食多啲。」
實不相瞞，我最記得沈卓盈嘅節目一定是2006年嘅《最緊要正字》，但其實原來Jess一開始做主持竟然係兒童節目《放學ICU》，「我初初係做兒童節目，都做咗兩年，之後先跳出黎做綜藝節目，再之後先係拍劇，個陣每樣嘢對我都係新挑戰。」現時專注拍劇嘅佢最想挑戰嘅竟然就係做「傻大姐」角色，「因為都好似我性格好直，無咩所謂，嘻嘻哈哈咁，希望之後可以有機會演到呢d角色。」
其實《平安谷之詭谷傳說》監製陳耀全對於沈卓盈飾演「北杏」呢嗰角色都讚不絕口，「佢今次表現我覺得有80分，因為佢做到北杏個種悲慘，令觀眾都覺得佢好可憐。」搵對方參演一角嘅原因，原來係因為監製之前曾睇過Jess在《梟雄》中的演出，「當時有場喊戲，佢做到一種令人憐憫嘅感覺，所以我今次casting北杏呢個角色，我就起佢。」而Jess都十分感激監製今次俾機會佢，仲話希望之後可以再一齊合作咁話！