【三個院子】陳小春告白情書超爆笑　獲老婆應采兒激讚

陳小春同應采兒最近以夫妻檔參加內地真人騷《三個院子》，並經營民宿同素人住客互動交流，在最新一集節目中，住客check out時，特意寫信感謝呢對夫妻檔，陳小春見人哋寫得咁開心，於是又寫埋一份，應采兒在旁好奇得很，於是預想老公會寫乜 ：「老婆大人，今天天氣晴 ……」陳小春聽到之後，即時好緊張咁話：「你點知我寫乜架！」

完全估到陳小春個心諗乜嘅應采兒，最終都係忍唔住拎起家書朗讀：「親愛的老婆大人，今天非常開心，因為能和你分享一點一滴，所謂的一點一滴就是點點點點點（陳小春真係寫咗好多…）你明白的，我愛你就像天空不能沒有星星、月亮和太陽。」難得老公咁情深，但應采兒就似乎唔係好慣，最後更笑到缺氧一樣，而在旁的陳小春亦一味傻笑，仲話封信未寫完，並即時補字：「也謝謝你幫我生了一個我相信他長大一定能成長的兒子，待續。」呢封家書雖然簡單得有點過份，但足以令應采兒笑得鬼咁開心，仲大讚係陳小春史上最好的一封信，呢對夫婦真係好正。