黃心穎擔正女一做丫鬟　唔覺得太遲：自己心態上ready

《學是學非》兩位是非精黃心穎同湯洛雯於無綫新劇《丫鬟大聯盟》再次合作，而該劇更係黃心穎入行以來首次擔正做女一，今午她出席造型活動時，就表示十分感恩。「話快又唔係，話遲又唔算，自己心態上ready，幸好今次呢部劇係喜劇，所以唔算好大壓力。但其實搞笑都難，同埋用多了力。」

劇中黃心穎將會是丫鬟的阿姐，除與湯洛雯有不少女人爭吵戲之外，亦會與洪永城有感情戲，但她笑言最多也是攬攬錫錫。劇集將於下星期開拍，問到是否要在工作中情人節，黃心穎表示：「重好啦，唔使諗要做乜。」心穎BB咁受歡迎，相信只會煩惱情人節要同邊位追求者一 齊慶祝，而非煩惱要做乜啦。

另外，剛踏入29歲的黃心穎，早已同家人及馬明BB食飯，禮物都收埋，不過，原來好戲在後頭。「昨日出席活動時，有個男fans送花俾我，而紮花中間有隻戒指。」又花又戒指，黃心穎指該男粉絲在場外一直苦等，她一開始也超擔心對方會下跪求婚。「自己見到都嚇一跳，但佢送完花之後又無任何表示，加上我見隻戒指唔係鑽石先敢收。」她又指該名男粉絲連要求合照也沒有，她有感場面尷尬，所以收花後以補妝為理，火速返回後台。