張致恆內地網絡電影拍唔停：我落咗好多功夫，做咗好多功課

前Boy'z成員張致恆 (Steven) 近期主戰大陸市場，早前就拍了兩套內地網絡電影《臥底賭神》以及《臥底毒龍》，兩套都是擔任男主角。Steven表示：「其實都好努力喺電影方面落咗好多功夫，尤其是好開心有老闆肯開戲畀我，咁我都好畀心機去做唔同嘅功課。希望自己可以喺拍戲方面有突破，有發展啦，因為我真係好鍾意演戲。第一部嘅《臥底賭神》喺愛奇藝嘅點擊率有二千幾萬，老闆好滿意，所以就開拍咗第二部嘅《臥底毒龍》。期待緊第三部，佢哋有一系列嘅臥底系列都會搵我去拍，應該3月尾拍第三部，有可能喺香港同澳門拍。」

至於是否主力於內地發展，Steven坦言：「無話主唔主力喺內地發展嘅，總之邊度有工作我就會去邊度，搵錢唔係淨係喺一個地方，邊度有機會都會去。今年工作上有好多大計，不停咁拍戲，同埋錄歌。臥底系列除咗網絡電影，嚟緊仲會開網劇，希望可以同多啲唔同嘅人合作。好似喺《臥底毒龍》同盧惠光合作，同佢識咗十幾年，今次係第二次合作，好開心，對上一次合作係十幾年前。」