張致恆內地闖出一片天　告別貧困日子：試過3年月入得2、3千蚊

90年代港產男子組合Sun Boy'z四位成員入面，有一位早已退出娛樂圈，而仍然留在幕前發展的，當然是以陳偉霆 (William) 發展得最好，自從轉戰內地之後就撈到風山水起，仲打入了「2017福布斯中國名人榜」，排在榜單的第21名，就連黃曉明都只是高過他5位咋。而關智斌 (Kenny) 都唔弱，近年在大陸發展成績理想，有傳他身家已過億，早前又在港花千萬買樓。而一直予人感覺最貪玩又成日顧住媾女，且曾經自嘲是人棄歌手的張致恆 (Steven) ，原來最近都在大陸闖出一片天了，頻拍網絡大電影兼擔演男主角，據知，一部片酬有近30萬人民幣。

香港01記者就電話訪問了Steven，他說：「片酬收幾多就唔好意思講喇，總之就6位數字啦。」Steven現在終於算是做出成績，工作量激增，收入亦比以前穩定多了，不過他以往無咩工作的日子，當然也捱過窮，他說：「依家都算係搵到啲錢，叫做食得飽瞓得安，但係以前最難捱嘅日子，係試過連續3年，每個月都係得好少錢，每個月得2、3千蚊收入，真係好難捱。試過有次我同梁雨恩要夾錢食飯，我銀行戶口有$60，佢有$40，佢過數畀我，我再㩒錢出嚟一齊去食飯。嗰啲日子好多嘢都捱過，所以知道自己其實真係要努力囉。」