【補辦婚宴】吳日言古蹟擺酒 先等入會再經英文面試：比想像中難
依家喺香港地結婚要擺酒，閒閒地都要早返一年半載，除咗因為要儲錢，原來想BOOK個心水場地都唔係一件容易嘅事。吳日言同男友Barry愛情長跑足足17年，到2016年10月正式於日本沖繩拉埋天窗。又過咗年幾之後，終於喺香港補擺喜酒，吳日言接受《香港01》訪問時話：「我都估唔到場地面試都要成7個月﹗」到底佢揀咗個咩婚宴場地咁厲害呀？
結婚一年補擺囍酒
吳日言做咗林太已經有一年幾時間，到1月27日先喺香港筵開十圍補辦婚宴，圈中人就只邀請咗江若琳同男友蕭潤邦，茜利妹以及DJ Leo。睇相見到Yan全晚只著一套紅色心型胸晚裝長裙，配上簡單妝容以及金器，拖住老公滿場飛同賓客影相。細心睇呢個場地相當精緻充滿英式古典味道，原來係位於中上環區嘅The Helena May（梅夫人婦女會），Yan接受香港01訪問時就話：「其實喺呢度擺酒比自己想像中更加唔容易。」
過百年法定古蹟
原來喺沖繩行禮之後，Yan同丈夫都想喺香港補擺喜酒：「但揀場地時就唔係好想一般酒店，成日去飲覺得好悶無咩特別，加上圍數唔多想搵啲靚啲袖珍啲嘅地方。」直至見到呢座位於半山花園道，別具維多利亞及愛德華古典復興式建築格調嘅大樓，Yan就一見傾心決定喺度擺酒，估唔到呢個先係重重難關嘅開始。
這座位於香港中環花園道35號的梅夫人婦女會主樓（The Helena May main building），於1916年落成，香港日治時期曾被日軍佔用作為會所和馬廐，二戰結束後又曾被英軍短暫徵用，後來香港女童軍亦在此成立首個總部。1993年，建築物主樓被政府列為法定古蹟。
搞足大半年先入到會
Yan一查之下先知道要喺度擺酒先要做會員：「以為做會員啫，遞表就得，原來係要人推薦，身邊又無朋友係會員，只能自己寫信自薦，職員話寫完信要等兩個月收電郵去面試。面試當日，有兩個外國人同我全程英文面試，自己咁大個人，見工都未試過要全英文interview，等面試要等一個月，面試完又要等一兩個月先知結果，足足大半年時間先做到會員先可以book場。」
雖然攪足咁耐，Yan依舊覺得相當值得：「要有一個心儀地方辦喜事，排隊真係排足7個月，宜家連結婚都要排隊，都相當值得，咁有古典氣息嘅地方，切合我同老公嘅愛情故事，一樣都係咁細水長流。」