傅穎靚樣7.0版本再回歸　自稱點講都唔會嬲：已經覺得冇所謂

近年長駐內地工作的傅穎，踏入2018年終於「回流」香港，聯同Supper Moment 拍攝服裝廣告。「對上一次喺香港工作已經係2016年，都開心大家睇到我有運動細胞。」她表示於廣告中有大量的跑步場面，幸好自己本身熱愛外户外運動，所以並不成難度，至於酬勞方面，傅穎就話「滿意」。不過，問到傅穎平日有否聽Supper嘅歌，佢就有少少尷尬咁話：「今日開始會聽。」傅穎長期喺內地工作，Supper又咁本土，無聽都好正常，唔使尷尬喎。

傅穎以前Cookies時期曾經被評為「好pure好true」，後來傅穎2007年開始再進化以金色曲髮、大眼仔打扮，一度成為網民女神。自從北上發展後，樣貌成日被人懷疑多次進化，2016年更拍片澄清「再進化」都只係化妝技術，今次傅穎返香港拍廣告，望落好似係有啲唔同樣，唔通又再七次進化。問到Theresa介唔介意被人話「再進化」？她好大方表示唔介意：「唔會嬲，因為已經覺得沒有所謂！」

近期不少歌手玩集體回憶，傅穎有否打算也加入此行列呢？「其實我無咁嘅plan，近年工作重心都在內地，但2018年第一次工作係喺香港，自己都覺得有意義。」咁留守內地是否因為想多同男朋友相處呢？傅穎今日就宣布已回復單身，並謂與男友已分開數月，但原因佢就不願多提。傅穎於2016年時表示蜜運中，但只肯透露對方係蒙古人，去年九月回港出席友人婚宴時，提到男友時支吾以對，仲話自己無正式認過有男友。

今年三十有三的她會否對人生大事著緊呢？傅穎指身邊朋友比她更緊張，媽媽更由她30歲開始不斷催婚，但自己暫時就想以工作為重。「但如果緣份到的話，擋都擋唔住。」