【萬千星輝】飛躍進步男藝員　其實無人比袁文傑更有資格攞

倒數一個星期就係台慶頒獎禮，今日就想同大家講下最應該攞《飛躍進步男藝員》獎項，有唔少人都睇好入足圍5次嘅楊明可以攞到，但今日我就唔係想講佢！有個人雖然無入圍到今屆該獎項，相反男配角就有佢份，但其實佢係去年嘅表演都好大飛躍好有進步嘅演員，究竟係邊個呢？就係前年由亞視轉到TVB工作，今年憑《不懂撒嬌的女人》游生一角，成功引起觀眾留意兼係娛樂圈撈足23年的袁文傑。對於入TVB兩年就已經有份參加頒獎禮揀角逐，袁文傑接受《香港01》訪問時就話的都係平常心，「今次對手眾多，入到已經好開心。」

1990年參加TVB藝訓班後就轉行做model嘅袁文傑，於1995年加入亞視。係亞視期間佢都備受力捧，成為當家小生之一，又拍劇又做主持。直到2012年初，他在合約完結後正式離開亞視，結束17年的賓主關係，並轉投Now。兩年後，袁文傑約滿後就轉為自由身。其實無論係亞視還是Now又好，袁文傑都係寂寂無名，係電視見到佢都只係講一句，「哦，佢亞視㗎嘛！」完全講唔出佢有咩代表作。直到前年佢以45歲之齡加入TVB，當時更被傳無綫以過百萬簽做親生仔，而參與的首部劇集《不懂撒嬌的女人》飾演超級霸氣CEO游生一角，演技出色成功引起網友留意。袁文傑加入短短兩年時間，憑住游生一角而爆紅，相比起之前嘅時間，所以你話TVB魔力幾大，今次只係入圍男配角獎項，真係太可惜。

另外，相信大家最記得一定係袁文傑出晒名係阿仙奴忠粉，仲曾係網台開咪講足球同寫波經，去年佢係無綫仲做埋講波佬幫足總盃做旁述，不少觀眾都激讚袁文傑夠中立同做足功課，超班嘅表演完美大勝人稱荷蘭叻嘅陳百祥，如果可以入埋《飛躍進步男藝員》，應該都唔會有人會有異議！

同樣係今次頒獎禮都好應該要入圍嘅滄海遺珠，就一定有《溏心風暴3》中的Nic少唐文龍份。劇中同陳敏之的不倫戀，到最後被夏雨發覺他與女兒的關係，最後夏雨嬲到要成杯奶茶潑落去唐文龍，大罵一句：「X街！」睇到班觀眾大快人心。不過佢就無袁文傑咁幸運，因為唐文龍今次係頒獎禮乜獎項提名都無。

入行24年嘅唐文龍，在2005年與TVB約滿後曾到亞視拍劇一段時間，之後他將事業重心轉移到內地，一拍就拍11年。他去年受訪時曾透露當初北漂的日子，因為收入不穩窮到九個月只吃麵包同麥皮，一度想放棄，最後到2013年拍攝內地劇《女人幫》才有起色。直到去年他以自由身身份回歸TVB拍攝《溏心風暴3》，再次引起觀眾的關注。所以今次無入圍到《飛躍男藝員》獎項，TVB真係要檢討下！