藍潔瑛認遭性侵訪問被翻炒　曾志偉嚴正聲明非事實

10號早上，一段影星藍潔瑛2013年嘅訪問片段，於微博瘋傳，當時鏡頭後嘅記者，詢問藍潔瑛，曾經被影壇大哥性侵一事，藍潔瑛親口承認曾被性侵犯，當時鏡頭後記者提問時男星名字係被消音，但呢日片段再現時，就直指侵犯佢嘅係曾志偉以及已故影壇大哥鄧光榮。就此指控曾志偉發表聲明，指呢段係經過剪輯嘅不實視頻，會堅決追究法律責任。

呢條短片中，藍潔瑛所講內容同2013年曝光訪問片段一樣，但當中疑點重重，首先當年片段中提問係男聲，但今日再度流出時則變成女聲，而且似乎係重新配音，兩個人名曾志偉及鄧光榮都係從提問者口中講出嚟，並非藍潔瑛親口講出，佢本人全程並無提及人名。

就呢段翻炒出嚟嘅訪問片段，同日下晝曾志偉發出聲明，強調內容並非事實。「網傳所謂『曾志偉性侵藍潔瑛』視頻係經剪輯的不實資訊；本公司正告相關不實資訊的發布者及轉載者，務必第一時間刪撤相關不實視頻（資訊）。針對此次造謠事件，本公司及曾志偉先生已委請北京星權律師事務所依法取證、嚴肅處理，針對怠於終止侵權行為者，本公司及曾志偉先生將堅決依法追責！」