【溏心風暴3】王浩信同岑麗香愛情線老土　今時今日仲玩賣身救父

無綫50周年台慶重頭劇《溏心風暴3》的劇情愈來愈緊湊，今晚播出的一集就會主力講Kyle (王浩信飾) 同Belle (岑麗香飾) 呢段愛情故事，王浩信苦戀了香香30幾集，上一集終於對遇險出事的香香說出了心底話：「我仲好想同你喺埋一齊㗎！」亦都打動了香香令她甜在心頭，決定接受Kyle。原本呢對小情人今集開始正式拍拖，不過以TVB一貫的手法又點會畀他們發展得咁順利吖，要不然也不會做了咁多集都一齊唔到啦。

所以正當香香同王浩信以為有情人可以排除萬難走埋一齊的時候，就出現了香香老豆間公司股價大跌，老豆生意失敗離家出走的情節喇。而最老土的劇情是講香香老豆需要50億先救到間公司，Brian (陳智燊飾) 媽媽楊太 (韓馬利飾) 就提出要香香嫁畀Brian來換取她出錢相助。香香為了幫屋企，當然一口答應啦，雖然她心入面很不捨得王浩信，卻甘願放棄愛情賣家救父。最後她去跟王浩信交代清楚，而王浩信跟她剖白的一幕，所講的一字一句都好令人感動，兩個都喊得好淒涼，真係好慘呀！