羅莽同美國粉絲做深情專訪　憶曾被惠英紅踢中要害之後一定要打底

現年63歲的羅莽憑住他年青時所拍的邵氏武打電影，早就衝出國際，打入了美國市場，在當地更有一班Die hard粉絲，他的功夫影星形象一直深入民心。早前電影公司就特地為羅莽師傅做了一個深情專訪，更備有英文字幕予一班美國粉絲觀看，讓大家可以對他有更深入的認識和了解。羅莽師傅講了很多他拍電影的趣事，又講下與自己合作過的藝人，其中他講到惠英紅（小紅姐）時更是七情上面。

點解羅莽師傅講小紅姐時會咁肉緊？原來是因為他曾經被小紅姐踢中要害，即場痛到大叫。他說：「我同惠英紅拍咗套《扭計雜牌軍》電影，都要動作嘅，咁我梗係做下把，做壞人啦。有一場戲就係我需要打到瞓喺地下度，一字碼咁擘開對腳，惠英紅就要飛腳剷落我度，個動作係咁設計，咁我就向後退，佢剷一下我退一下。咁佢同我講咗話『一定剷你唔到㗎，你放心，你唔使墊嘢都得㗎喇。』咁佢咁講，我就諗住係啦，佢拍咁多功夫片啲位實好準。因為我未同佢合作過，係第一次，佢話唔使墊嘢我就唔使墊嘢啦。佢剷一下我退一下，點知到第三下佢一腳剷埋嚟，哎呀，好痛呀！」

不過羅莽師傅強調自己無怨言，拍戲遇有意外在所難免，他亦因為小紅姐呢一腳而有所領悟：「拍戲嘅嘢，都係人哋講咩唔好信，自己用咗護墊打底就好啲，係我經驗之談。點都好，一定要安全第一，對邊個對手都好，最緊要保護自己，亦都保護對手，大家安全就OK喇。」