伍詠薇同有線合作唔怕TVB「封殺」 「我係一匹野馬」

伍詠薇（伍姑娘）自2013年與無綫電視（TVB）解約，結束21年賓主關係之後，雖然一直不多出現在電視機上，不過工作機會反而沒有減少。最近更與奇妙電視合作拍攝真人show節目《四小時生活圈》，將到日本東京體驗「日本人妻」的生活。伍詠薇接受《香港01》訪問時更坦言，「我係一匹野馬，鍾意自由身多啲」。

其實電視圈的行內，一直有個傳聞：拍過友台的節目或劇集的藝人，TVB會永不錄用。伍姑娘又恰好這次與奇妙電視合作。不過伍姑娘就一點都不擔心。「從來冇人企出嚟發出過呢個聲音，咁其實都係咪真嘅呢，就冇人企出嚟解答過。講真我都做咗呢行咁多年，由亞視、無綫、ViuTV、有線，都做過。其實呢幾年都build-up咗（關係），其實呢一行都係良性競爭。其實我做咗TVB咁多年，亦都係由細開始睇TVB大，所以另一方面我都同TVB建立咗個好良好關係。」

「其實我啱啱先幫佢拍完《飛虎激戰》，之後就返咗去大陸拍劇，跟住就係奇妙電視呢個節目《四小時生活圈》。再之前我就幫ViuTV做咗一個節目嘅導演。所以你話呢行係咪咁嚴重呢？其實都要睇你自己嘅公關手腕，我又唔係咁擔心。」

伍姑娘至變成「自由身」之後，發展好似更勝以往。除近期新劇《飛虎激戰》外，更有中國大陸劇的拍攝。《香港01》訪問中，她更坦言現在與各電視台的關係更適合自己。伍詠薇：「我諗睇年紀啦。如果啱啱入行其實大樹好遮蔭係啱嘅，嗰陣都有人說我出去拍電影，我都冇出去決定留咗係ATV一段時間，因為我知道自己想做啲乜嘢。到TVB嘅時候，我都簽過management（行內俗稱「親生仔合約」）。後尾一路長大，自己知自己性格係點。我發覺做咗咁耐，同好多前輩高層嘅關係，大家都係朋友。好多野傾起嚟仲方便啲，譬如廣告商鍾意同你傾，多於同大公司傾。所以以我性格，其實我鍾意自由身多啲，我係一匹野馬，捉唔到我㗎。」