關心妍為慈善基金勞心勞力 望1年內以馬拉松籌款
撰文：鄺鈺瑩
出版：更新：
關心妍（Jade）今午以頒獎嘉賓身份出現「全港青少年進步獎頒獎典禮」，近日忙於慈善基金的她在台上鼓勵一眾學生不要輕易放棄，並唱出《另一個舞台》為大家打氣。
Jade笑言學生年代從未得過任何進步獎，反觀唱歌獎就贏過唔少，她透露這個頒獎禮意義重大：「剛好3年，由我有BB嗰陣係第1屆，到今日自己成立埋慈善基金，由百幾人到700幾個學生去參加，好感動，好想話佢哋知呢個世界係難，但唔好咁易放棄，要堅持。」
Jade表示由歌唱事業到成立基金都困難重重，但從未想過放棄，她之後又透露早前慈善晚會所籌得的善款，一半捐出，一半預計用在成立辦公室。「想在港島區租辦公室，但籌到的錢其實唔多，成事之後每個月都想幫助10個有需要的學童。」Jade雖然有意以運動形式如馬拉松再次籌款，但她直言要抖抖，最快明年才成事，因為現實與理想並非想像中簡單。
Jade表示由於囡囡開始返play group，令自己有多點時間處理基金事宜及工作，但每日都盡量送返學並趕在晚餐前回家。問到經常到學校分享，會否大有得着，Jade表示收埋唔少法寶，將來可用在囡囡身上。「但佢都係硬頸性格，似我，所以同老公都要調節點去教。鼓勵當然都會，但唔會係咪都讚，唔想畀佢有錯覺。」