黑色透視大媽look上水倒數　張秀文：唔會因幾個評論而覺有咩問題

究竟artist出活動著衫可以去到幾盡？或者大家可以睇一睇TVB藝員張秀文（Sammi）在上水出席除夕活動時著的服裝，活動原本係著住紅色華麗晚裝長裙行catwalk嘅佢，都顯得高貴大方。但行完catwalk之後著返自己嘅衫咁就出事喇！佢以一身黑色漁網透視長裙look示人，有網友就話驚嚇程度如果滿分係10分嘅話，佢一定拎到9分！張秀文接受《香港01》訪問時表示漁網透視衫係自己買，對於今次有網友抨擊，Sammi就認為，「我覺得靚著得舒服咪得，唔會因為個幾個網友嘅評論而覺得有咩問題。」

Sammi笑言不是為了見oppa才著得咁性感，而是見最近潮流都興這種黑色透視漁網look，所以就首度挑戰一下，至於該服裝是甚麼牌子及價錢她就未有透露，「平時出活動嘅衫多數都係自己準備比較多，有時公司借衫未必會幫你揀到你心水個件。但我唔主張一定要買貴，最重要係著得舒服同自己覺得靚就可以了。」她其後表示平價同貴價衫都有買，「始終出活動嘅衫你可能著一兩次就放係屋企，都幾浪費，都係個句自己鍾意就得。」咁今次除夕出騷酬勞係幾多？Sammi就話從來無過問，「因為去年都忙著拍劇，有活動做又唔會特意去問酬勞係幾多。」

至於踏入新一年，Sammi就希望今年可以以戲劇作品示人，「其實去年都多了好多機會拍劇，都發現自己鍾意做戲，始終做戲好需要經驗，趁住未係太遲嘅時間拍多d劇，自己的確係呢一方面比較少經驗，希望今年可以博多啲！」