【香港工時最長】TVB返工冇收工　鐵人馬國明：拍劇預咗冇假放

有時得到「第一名」，不一定值得高興。就如香港榮登了全球工作時數最長的城市第一名，每周工作大約50小時。第二、三位都是第三世界城市：孟買及墨西哥城，但每周工時比香港少7小時。證明在香港生活從來不易，工作每分每秒都是血汗錢，也不是多勞多得。

香港一直都有組織爭取標準工時立法，可是一直遙遙無期，所以有些Office工作，雖說朝九晚五，但五點打後咪又係要OT！辦公室工種已是如此，更何況擺明不能準時放工的工作？例如在TVB打工的藝人，連踩是常識吧。之前拍TVB 50周年重頭劇《深宮計》的馬國明，因為要趕進度，結果要連續開工27.5小時！收工之後，劇組才「皇恩浩蕩」讓馬明放假一天，一日只得24小時又怎可以彌補超時工作？古裝劇都有做喇，恢復元氣也不只用一天吧！加上再不是學生時代，有時唱完通宵K，之後可以走幾日堂補眠（在出席率未見紅情況下），到現在再不是十八廿二，新陳代謝比以前慢，又怎可以完全有精神呢？

馬明這個例子，其實只是冰山一角。早前視帝陳展鵬拍攝《天命》，更直言自己有53小時沒有睡過覺，聽到都覺得好癲。過往都有離巢藝人回憶在TVB開工的經歷，主要共同點都是工時太長，就好似鄧萃雯之前講過，如果返TVB拍劇，基本要求一日工作最多10-12小時，就連從未在大台拍過劇的夏文汐，早前拍《逆緣》都開口要求工時不要太長，證明這也是在TVB拍劇的最大敵人。工作與健康，永遠都是後者最重要。

聽到不少藝人對TVB工時如此卻步，都會有興趣了解大台的福利制度，到底做藝人有無大假放？一年又有幾多日大假？試過做幾耐才可以真正收工？還是要找有「TVB鐵人」之稱的馬國明為我們深入探討。回顧剛播完的台慶劇《降魔的》，拍攝時間為期4個月，而馬明擔正做主角，基本上日日都要返工：「當時冇咩假放，因為《降魔的》大約廿集戲，唔會有好多演員，所以差唔多日日都要開工，變咗都會辛苦啲。不過拍大劇嘅，有多啲演員拆開唔同線，變咗唔使日日開工，咁樣會輕鬆少少。」

不過，馬明拍《深宮計》連踩27.5小時其實濕濕碎，他回憶起N年前曾經直踩4日：「好耐之前我試過連踩8張Rundown，因為張張都有我，呢8張rundown都拍咗成4日3夜，我就踩足咁耐。」On Call 36小時不是夢，因為馬明試過On Call 96小時…至於藝人能否好似其他人般有年假？馬明就話：「呢個行業又好難概括咁講假期呢樣嘢，始終每個人張合約都唔同，好難講你知。不過都好睇自己嘅，當然可以請假，不過返工就唔會有假放…即係嗰日唔使開工咪就係放假囉！」