【後生仔傾吓偈】植入式廣告無處不在　痛哭唔遞紙巾遞雞係咩玩法

無綫J2台播出嘅節目《後生仔傾吓偈》，以較貼地話題吸引唔少年青觀眾，平安夜晚由J2搬到翡翠台播出1小時特備版本，請來8位藝人作客，加上3位主持同8位學生KOL，19個人做一個節目係就係好熱鬧好有氣氛，不過都唔及一大堆雞咁搶鏡，唔係走地嗰啲而係食嗰啲炸雞呀，之前無綫已經試過喺台慶派炸雞，被通訊局裁定違反廣播條例兼罰款，今次成個鐘節目有3分1時間都見到Logo，算唔算公然挑戰呢通訊局？

呢集《後生仔傾吓偈》平安夜特別版，節目一開始搵來何雁詩周志文周志康等人獻唱聖誕歌，本身非常有氣氛，不過於節目1分02秒開始，見到一堆桶裝同盒裝食物，就連飲品紙杯上都有大大隻Logo，無論係近鏡定遠鏡都清晰可見。最誇張一幕係何雁詩講到以前經歷時扮喊，隔籬嘅周志文唔係遞紙巾，居然遞上一桶炸雞，令人傻眼，涉嫌違反《電視通用業務守則 — 節目標準 11章 間按宣傳》，多次過份突出非節目需求的商品展示。

無綫近年屢次因植入式廣告違規被通訊局罰款，最為人熟知嘅一次就係2015年12月23日，於《萬千星輝頒獎典禮》中，硬插藝人食炸雞環節，歷時1分12秒，當中14秒清楚見到KFC商標。通訊局喺16年5月裁定該環節令人覺得牽強，干擾觀賞趣味；加上無綫已多次違規，故罰款15萬元。無綫因不服裁決提出司法覆核，質疑現行守則對植入式廣告過度規管，侵犯言論自由。通訊局今年2至6月曾進行意見調查，考慮放寬規管間接宣傳和植入式廣告條文，順應民意與業界需求。