【公公出埠】女藝人失場10次揚言永不合作　黎耀祥：我好少發脾氣

昨晚播出的無綫旅遊節目《公公出埠》除了有黎耀祥 (祥仔)、蕭正楠 (Edwin)、曹永廉 (阿廉) 以及黃浩然四個老友繼續在布吉吃喝玩樂，增進下彼此的hehe情誼之外，仲有一part告密篇，題目就是講出「一個你呢世都唔想再合作嘅藝人」，由祥仔負責宣布呢個題目，再睇下由邊個講先，結果就輪到祥仔講喇。祥仔講了一個女藝人，咁當然無開名講是邊個啦。隠名爆永遠都是最引人入勝㗎嘛，估不到TVB都要玩呢招。

祥仔回想返當年同呢位女藝人一齊拍劇的情境話：「好多年前拍一部古裝，嗰套戲有鄭伊健，好耐㗎喇。有一個女藝人同我同埋伊健嘅戲份比較多啲，咁但係呢個女藝員就出咗名㗎喇，蒲台島島主呀，蒲親都要 (畀人) 抬出嚟嘅。你知道啦，去蒲，第二日外景早班，梗係返唔到啦。一個返唔到，唔緊要，我哋出發去拍住先，拍到睇下佢晏晝返唔返到嚟，咁就當然啦，全日佢都唔會返㗎喇。拍我同佢兩個嘅戲，咁就搵替身着佢嘅衫，拍佢個背脊。如是者唔係一次，係好多好多次，係10次以上！」此時阿廉即刻話：「都好離譜喎，我未見過你發脾氣。」祥仔即抵死地說：「我真係好少發脾氣，除咗鬧你。」

咁究竟祥仔口中講的呢位「蒲台島島主」是邊個呢？網民都紛紛在討論區上討論估下是誰。而翻查返資料，有祥仔又有鄭伊健一齊拍的古裝劇，仲要有個出名愛夜蒲的女藝人，兼同他們兩位戲份比較多，符合晒以上條年的就是TVB於1994年播出的《射鵰英雄傳之南帝北丐》呢套古裝劇喇。當中與祥仔和伊健有較多對手戲的就是在劇中飾演劉瑛姑的陳加玲，而她確實是蒲精嚟。不過她早已淡出幕前，祥仔應該都唔會再有機會同她合作㗎喇，可以如願以償啦。至於Edwin、阿廉同浩然又有邊位藝人呢世都不想再合作？Sorry，TVB全部刪剪了，無得睇呀。