【溏心風暴3】胡琳首次拍劇同唐文龍有床戲：我係零記憶！

《溏心風暴3》內幾乎都是電視機中常見的演員，雖然話個個都係好戲之人，夏雨、司祺姐、陳敏之等朝見口晚見面，難免都會睇到有啲悶。不過，近日就新出了一個耳目一新的角色，Daphne（胡琳），劇中胡琳更是飾演阿Nic（唐文龍）的嬌妻。相信有聽開黑膠唱片的人應該對這位被喻為「靚聲天后」的胡琳應該不會陌生。

胡琳由2006年開始出道，歌唱事業至今都已經11年。不過原來胡琳是由紐約電影學院畢業。睇一睇，原來佢都算係茱莉亞羅拔絲的師妹。「其實我喺紐約讀Performing Art嘅時候就已經對演戲好有興趣。只不過做歌手係自己最大嘅興趣同目標，所以先會做歌手。理所當然以歌手出道，即使對演戲有萬般熱誠，都未必有啱嘅機會去拍戲。今次好難得係家豪哥（劉家豪監制）俾呢一個機會我。」

胡琳接受《香港01》訪問，談到第一次拍劇的感覺。她説：「就算係平時唱歌even係演唱會出咗blue-ray之後，我都唔夠膽睇返自己嘅演出，做戲就更加（唔夠膽睇返），我一路睇一路覺得好尷尬。因為我要睇返自己有啲咩不足，所以我都會集集追。不過我只係接受到聽返自己把聲，但係睇返畫面我都係想「中」自己。哈哈。（係因為拍親熱戲尷尬？）其實係純粹見到自己個樣尷尬。」

劇中胡琳就飾演唐文龍的老婆，有機會接觸萬千師奶心中嘅男神就梗係幸福啦。據知劇中除了陳敏之與唐文龍有激烈床戲之外，其實胡琳同唐文龍都有親熱戲份。不過胡琳對於這些親熱戲份就表示已經一概忘記了。「（套劇）就嚟出嗰時，人哋問我有咩親熱戲。我係零記憶。我淨係記得佢又錫我塊面，但係我唔記得有錫嘴嘴。可能係因為佢將我帶入個角色入面，所以我完全唔知。點解咁得意呢？不如你幫我問下佢，係咪有落藥吖？」

講到唐文龍呢個對手，胡琳仲係咁讚佢添，話佢演技好之餘又帶到佢入戲，令佢「深深地感覺到阿Nic（唐文龍）同Daphne（胡琳）好幸福」。問到胡琳享不享受與唐文龍拍戲時，胡琳就反問說：「你意思係唔係即係每次見到佢都想扯爛佢件衫？哈哈哈。其實我唔明點解佢着埋啲衫，都要好似就來爆開咁。佢可唔可以買大一個size？其實我身邊嘅朋友講起佢都會心心眼，所以我係佢哋嘅羨慕對象。」

胡琳作為初次拍劇的新手，不止劇內代入了「阿Nic老婆的角色」，戲外更是不能抽離角色。「我而家已經好返啦，拍緊劇嗰一排，由於我深深相信我哋係幸福家庭，到我發現佢哋有婚外情之後嗰一刻，我真係嬲左佢哋一個星期左右。」