《無間道》香港上映轉眼15周年　成個港產電影風潮俾佢改變晒

「對唔住，我係差人。」2002年12月12日，《無間道》喺香港正式上映，原來眨下眼已經15年。電影雲集梁朝偉、劉德華、曾志偉、黃秋生等重量級演員，創下5500萬票房成為當年冠軍，橫掃第22屆香港電影金像獎7個獎項，被美國有線電視新聞網CNN評選為「影史18部最佳亞洲影片」之一。亦令港產電影市道從谷底翻身，重振電影公司投資意欲。其實呢套戲仲為影壇帶來唔少影響。

開啟卧底片風潮

港產片一向以警匪片見稱，槍戰及飛車場面一浪接一浪，不過《無間道》動作場面不算多，反而於竊聽時雙方猜度誰是卧底，甚至劉德華梁朝偉於高級音響店中對話，形造出緊張感，將港產警匪電影格局，由動作連場蛻變成捉智雙雄式緊湊，掀起往後十多年至今，開拍卧底電影熱潮。荷里活更買下版權，由馬田史高西斯執導翻拍成《無間道風雲》。

電影金句

無論係梁朝偉拒絕劉德華放生要求嘅「對唔住，我係差人。」向黃秋生發洩長期擔任卧底壓力嘅「三年之後又三年，十年都嚟緊頭啦老細。」仲有傻強教大家點分邊啲係差人「一個人做緊一樣嘢，但係又好唔專心咁望住我地就係差人。」一聽到大家都即刻有畫面，深入民心。

卧底生活

七八十年代港產警匪片，如果卧底同上司聯絡，總係會喺一啲隱閉地方見面。但《無間道》中梁朝偉及黃秋生每次見面，都會光天化日下於天台出現。即使到尾段梁朝偉拆穿劉德華身份，二人對峙場面，都喺北角政府合署天台拍攝，呢個地方後來更成為香港電影及MV熱門拍攝場地。另外梁朝偉以摩斯密碼，將情報通知黃秋生，亦成為往後卧底電影參考。

傻強爆出

除咗幾位影帝，《無間道》中嘅傻強絕對係令人印象最深刻嘅一位，杜汶澤亦憑住呢個角色，獲提名第22屆香港電影金像獎最佳男配角。不過原來當年傻強係由林家棟飾演，佢曾經喺訪問中講到，因為之前拍劇無機會飾演警察，加上華仔係佢老闆，最終選擇演劉德華身邊的壞警察「大B」。