劉德華獲封文學博士老婆愛女冇到場　華仔：帶件袍返屋企同佢影

恭喜哂劉博士（劉德華），獲頒樹仁大學榮譽文學博士學位。今日華仔更親身到樹仁大學畢業典禮接受學位，雖然華仔家人朱麗倩及囡囡都未有到場，但現場所見都座無虛席，相信出席的學生家長中，有不少人都是華仔的粉絲，甚至乎在典禮後，都有不少教授職員想見下華仔，同佢合照留念。對於被主持介紹講足１０分鐘，華仔好意外，他說：「有諗過自己原來做過咁多嘢，自己都唔知，有付出過都係一件好事嚟嘅。我希望我可以做一個role model，俾到年輕人一個示範。」

訪問中劉德華（華仔）被問到為何家人都未有出席。華仔就風趣的回答説：「佢（朱麗倩）驚搞亂檔。」而囡囡呢，華仔就解釋道：「囡囡要返學，或者帶件袍返屋企同佢影。」所以就沒有出席。至於慶祝活動，華仔就話「唔會特別慶祝」。不過華仔就補充道，呢次獲頒榮譽文學博士，就希望可以透過自己去宣揚中國文化，例如粵劇。啱喎，因為上一位同樣是榮譽文學博士的就是粵劇名伶白雪仙（仙姐）。華仔咁答其實都好合理。

致於華仔墜馬的傷勢。這方面大家又不必擔心太多，因為華仔今日出現時已經不需要拐杖，所以傷勢好得七七八八。不過，華仔表示對騎馬心有餘悸。「我就有少少驚騎馬，個（墜馬）陰影仲未過。我宜家睇返自己之前拍戲騎馬都驚。真係好彩。」訪問中記者就打趣的問道劉德華「晉升」做「劉博士」之後會不會「加人工」（加片酬）。劉博士（華仔）回答說：「係咪貴啲？會㗎，哈哈哈。不過唔會對票房有幫助。」嘩，華仔呢位「民選特首」真係好謙虛。