【任噏亂評】Google揭露最赤裸真相　鬧完咪又系睇返TVB！

而家呢個世代，好多網民似乎會不屑收睇TVB劇集。講起大台，主要都會講幾句對白：「我唔睇膠劇㗎喎！」、「睇韓劇好過喇！」，再唔系每一套劇都會揾錯處，睇下當中有啲咩位系低成本Hea作。再唔系就好似最近《溏心3》咁，見到張海報就話棄劇：「套路照舊，罷睇！」不過，有一種證據叫數字，而數字從來都唔會講大話。最近Google就公布「2017年熱爆關鍵字搜尋排行榜」嘅結果，第一位系呢排人人吹奏嘅《降魔的》，咁都未算！十大排行榜入面，有4套都系TVB劇。內地劇《射鵰英雄傳2017》仲因為TVB播，多咗人搜尋，呢個現象證明咗啲咩？證明咗TVB基本上已經佔據住你嘅生活！系霸權嚟㗎！

講到呢度，可能有讀者即刻反駁：「我從來都唔睇TVB㗎喎！」呢樣都明嘅…其實好多人都會有「口裏說不，身體很誠實」，就算你唔睇，你見到有網民講套劇有啲咩膠位，今集又死幾多人，就會開始手痕上Google揾。再唔系見到有啲唔起眼嘅演員，喺TVB挨咗幾多年先有返少少成績，你又會走去Search，因為鐘意睇人有幾慘…要揾嘅理由何其多，亦都知道大家系唔會講出口。

而且TVB愈多人口講嫌棄，證明愈佔據喺大家心中。就好似過去三年嘅十大熱搜字排行榜，TVB最盡都系佔一兩套，就好似2016年就有《城寨英雄》、2015年有《張保仔》，仲有2014年《使徒行者》，但2017年就嚟個大躍進，一炮過有4套，有《降魔的》、《不懂撒嬌的女人》、《使徒行者2》同埋《超時空男臣》。唔鐘意嘅理由可以得一個，鐘意嘅理由就好多，Cult、夠小品、夠抵死派膠等等，總之系令到你走去Search囉。再者，身處咩都鬧咗先嘅年代，其實TVB喺大家心目中好重要，而且幾乎站穩住腳囉。

再睇返香港附近，台灣嘅十大熱搜排行榜。當地第一位系第二十九屆夏季世界大學運動會，咁自己嘢支持都好應該吖！雖然台灣嗰邊，娛樂類別佔最多，但唔計韓劇嘅話，台灣咁多電視台，都唔愁冇劇睇，但都都系兩套上榜。相反香港呢？上年多咗個ViuTV，今年多埋奇妙電視，但點解連影都唔見？唔繫好期待《詭探》咩？又話Eason套《短暫的婚姻》值得一睇嘅？最後都不敵霸權，選擇投向TVB嗰邊…再一次證明，大台喺大家心目中好重要。

嚟到最後，見到香港台灣嘅十大熱搜榜，了解到呢一帶嘅人都系鐘意消遣娛樂…但台灣都起碼有單當地年度盛事吖…但香港除咗睇劇，Apple出咩機，都應該有其他更本地嘅嘢值得我哋關心㗎嘛。再睇下美國嘅Google十大，最軟性只系手指陀螺同體育賽事，其他都系時事要聞，見唔到iPhone 8、iPhone X…好多人話《權力遊戲》、《怪奇物語》好睇？Marvel電影又有新Trailer？DC電影有幾不濟？Google都見唔到佢哋…嗰榜只見到佢哋眼中真正嘅大事。而香港最重要就係TVB…喺呢個榜學到啲乜嘢？就係唔好逃避真相，事實大家都鐘意睇TVB。