【神探李奇】張可頤羅嘉良好合襯 午間時段重播輕鬆喜劇有着數
TVB 50周年正在熱播嘅兩套台慶劇，收視口碑都不似預期，雖然未必話一定係新不如舊，但不時都有人話寧願睇番以前嘅經典劇集。隨住香港人生活習慣改變，深夜重播時段先係網民追劇黃金時間，TVB亦落足心機去排陣吸廣告。除咗深宵劇場，其實下晝重播時段，都有唔少主婦同學生放學後追看，繼《難兄難弟》13號播出大結局後，緊接播出嘅就係續集《難兄難弟之神探李奇》。
「人情人情如做戲」，呢首《難兄難弟》主題曲，好多80、90後觀眾應該耳熟能詳，而《難兄難弟之神探李奇》名義上係續集，但其實係兩個完全獨立嘅故事，而雙生雙旦中，只有羅嘉良同張可頤留任，宣萱及吳鎮宇未有參演，改為林家棟吳綺莉加盟。羅嘉良飾演嘅幹探李奇，被委任捉拿傳說中嘅黑玫瑰歸案，巧遇好友謝源（林家棟飾），於其老家藝園認識寶珠（張可頤飾）及芳芳（吳綺莉飾），更意外發現黑玫瑰蹤影。呢套戲係吳綺莉當年由亞視過檔TVB首套作品，雖然演技略嫌青澀，但不難看出亞姐冠軍出身嘅Elaine，年輕時外表的確非常出眾。
注意！青澀滕麗名
不過最搶眼嘅，反而係飾演姚麗娜嘅滕麗名，雖然只係配角，但佢將飾演嘅富家女演得入形入格，令人印象深刻。新秀歌唱比賽入行嘅滕麗名，於《難兄難弟》中飾演怕事溫文嘅阿珍，同姚麗娜極大反差，而滕麗名將兩個角色都演得非常好。其實同年佢仲拍咗《陀槍師姐》，陳三元一角令佢正式站穩一線花旦之位。
最後一部荔園實地取景劇
《神探李奇》多年來曾經5度喺TVB不同頻道重播，輕鬆喜劇都有其捧場客。呢套劇集亦係荔園拆卸前，最後一套於園內取景拍攝嘅劇集。呢套劇集聲勢雖然無《難兄難弟》咁強勁，歌曲又無《難兄難弟》主題曲咁洗腦，但改編自Bee Gees的《Melody Fair》，並由陳頌紅重新填詞的《愛不會變卦》，亦屬經典之作，每當「奇哥」羅嘉良和「寶珠」張可頤唱起呢首歌時，都會有種毛管戙感覺。